دەنساۋلىق ساقتاۋ مينيسترلىگىنىڭ مالىمەتىنە سايكەس، كوز جۇمعاننان كەيىن ترانسپلانتاتسيا ماقساتىندا اعزالارىن الۋعا رۇقسات بەرۋ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» قر كودەكسىنىڭ 209-بابىنىڭ 8-تارماعىنا سايكەس جۇزەگە اسىرىلادى.
«نيەت بىلدىرگەن ازاماتتار ءوتىنىشتى تىركەلگەن ەمحاناسى ارقىلى نەمەسە «ەلەكتروندى ۇكىمەت» ۆەب- پورتالى كومەگىمەن راسىمدەي الادى»، - دەلىنگەن مينيسترلىك حابارلاماسىندا.
ول ءۇشىن:
- egov.kz جۇيەسىنە ەلەكتروندى سيفرلىق قولتاڭبا نەمەسە بىررەتتىك كىلت ءسوز ارقىلى كىرۋ؛
- «دەنساۋلىق ساقتاۋ» بولىمىنەن «ترانسپلانتاتسيا ماقساتىندا قايتىس بولعاننان كەيىن ەرىكتى اعزا دونورلىعىنا كوزى تىرىسىندە كەلىسىمدى تىركەۋ نەمەسە كەلىسىمدى قايتارىپ الۋ (ياعني باس تارتۋ)» قىزمەتىن تاڭداۋ؛
- ءوتىنىش ءتۇرىن تاڭداۋ: «كەلىسىمدى قايتارىپ الۋدى تىركەۋ (باس تارتۋ)» نەمەسە «كەلىسىمدى تىركەۋ».
ۆەدوموستۆو اقپاراتىنا ساي، ەگەر ازاماتتار ءوتىنىشتى تىكەلەي ەمحاناعا بارىپ راسىمدەيتىن بولسا، وندا جاۋاپتى تۇلعا اۋەلى جەكە باستى جانە تىركەۋ مارتەبەسىن كۋالاندىراتىن قۇجاتتاردى تەكسەرەدى. كەيىن قايتىس بولعاننان سوڭ اعزا دونورى بولۋعا كەلىسىم بەرەتىنىن نەمەسە ودان باس تارتاتىن شەشىمىن ارنايى ۇلگى بويىنشا تولتىرادى.
«تولتىرىلعان ۇلگى تىركەلەدى. ال سىزگە ءبىرىنشى باسشىنىڭ قولى قويىلعان جانە مەديتسينالىق- سانيتارلىق العاشقى كومەك ۇيىمىنىڭ مورىمەن بەكىتىلگەن تىركەۋ انىقتاماسى بەرىلەدى. قازاقستان رەسپۋبليكاسىنىڭ ازاماتتارىنا اعزالاردى ترانسپلانتتاۋ تەگىن جۇزەگە اسىرىلادى»، - دەپ ءمالىم ەتتى ۆەدومستۆودان.
قوسا كەتسەك، ەلىمىزدە اعزا ترانسپلانتاتسياسىن قاجەت ەتەتىن 3562 ناۋقاس كەزەكتە تۇر. ونىڭ ىشىندە 77 بالا بار.