رەسپۋبليكا كۇنىنە وراي بارلىق مەكتەپتە سالتاناتتى جيىندار وتەدى
وندا وقۋشىلار مەن ستۋدەنتتەر ءانۇراندى ورىندايدى. سول كۇنى وقۋ وزاتتارى ماراپاتتالىپ، بارلىق ءبىلىم ورداسىندا «قازاقستان - تۋعان جەرىم، تۋعان ەلىم!» تاقىرىبىندا رەسپۋبليكالىق سىنىپ ساعاتى وتەدى.
«ەلىمىزدىڭ ءبىلىم بەرۋ ۇيىمدارىندا رەسپۋبليكا كۇنىن مەرەكەلەۋ جونىندەگى رەسپۋبليكالىق ءىس-شارالار جوسپارى بەكىتىلدى. رەسپۋبليكا كۇنى - مەملەكەتتىڭ سيمۆولىن ايقىندايتىن ماڭىزدى مەرەكە. بالا كەزىنەن باستاپ بالالاردى وتانعا دەگەن سۇيىسپەنشىلىككە، مەملەكەتتىك رامىزدەرگە، ۇلتتىق جانە مەملەكەتتىك مەرەكەلەرگە قۇرمەتپەن قاراۋعا باۋلۋ ماڭىزدى. وسى سەبەپتەن ەلىمىزدەگى بارشا وقۋشى ءۇشىن شىعارماشىلىق، تانىمدىق، سپورتتىق، مەرەكەلىك ءىس-شارالاردى جوسپارلاپ وتىرمىز»، - دەيدى ق ر وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا كارىموۆا.
رەسپۋبليكا كۇنىن مەرەكەلەۋگە ارنالعان ءىس-شارالار 17- قازاندا باستالادى. 1-4 سىنىپ وقۋشىلارى اراسىندا «اتامەكەن» تاقىرىبى بويىنشا ءبىرىڭعاي جالپى حالىقتىق ديكتانت وتكىزىلەدى. 5-11- سىنىپ وقۋشىلارى اراسىندا جالپىۇلتتىق ءبىرىڭعاي ەسسە بايقاۋى وتەدى. ال جوعارى سىنىپ وقۋشىلارى، ياعني 9-11- سىنىپ وقۋشىلارى اراسىندا «مەن ءوز ەلىمنىڭ ازاماتىمىن!» تاقىرىبىندا پىكىرسايىستار جانە باسقا دا ءىس-شارالار ۇيىمداستىرىلدى.
سونىمەن قاتار «قىران ەلىم - قازاقستانىم!» جالپى رەسپۋبليكالىق پاتريوتتىق اكسياسى اياسىندا كىتاپ وقىعىشتار بايقاۋىن، سپورتتىق سايىستاردى جانە «ۇلتتىڭ ۇلى ۇستازدارى» رەسپۋبليكالىق شىعارماشىلىق بايقاۋىن وتكىزۋ جوسپارلانىپ وتىر.