ادامدار نەگە رەنجيدى؟ پسيحولوگتاردىڭ پىكىرىنشە، بۇل اركىمگە ءتان جانە رەنىشتىڭ كۇشى سول كىسىنىڭ ءسىزدىڭ ەموتسيونالدىق تريگگەرلەرىڭىزگە قانشالىقتى تەرەڭ اسەر ەتكەنىنە بايلانىستى. بالالىق شاقتا بولعان اۋىر وقيعانى بەيسانالى تۇردە وياتاتىن سوزدەر نەمەسە ارەكەتتەر قاتتىراق اشۋلاندىرادى.
ەرەسەك ادام رەتىندە ءسىز ءوزىڭىزدىڭ ەموتسيالارىڭىزدى باسقارا الاسىز، ءبىراق يمپۋلسيۆتى «ىشكى بالا بولمىس» ءارقاشان رەنجۋگە دايىن تۇرادى: ءسىز ونى ەشكىمگە كورسەتپەي، «جۇتىپ» ۇلگەرسەڭىز دە، رەنىش قالادى.
رەنجۋگە بەيىم ەكەنىڭىزدى قالاي بىلۋگە بولادى؟
باسقالار ءسىزدى قانشالىقتى وڭاي رەنجىتەتىنىن ءتۇسىنۋ ءۇشىن بىرنەشە سۇراققا جاۋاپ بەرىڭىز:
قانداي دا ءبىر نارسەگە اشۋلانىپ، جارىلىپ كەتە جازدايسىز با؟
سىزگە جاقىندارىڭىز «تۇيمەدەيدى تۇيەدەي ەتەسىڭ» دەپ ايتا ما؟
«سەن مەنى دۇرىس تۇسىنبەدىڭ» دەگەن ءسوزدى قانشالىقتى ءجيى ەستيسىز؟
جاقىن ادامدارىڭىز ءسىزدىڭ جابىق ادام ەكەنىڭىزدى جانە ۇنەمى وزىڭىزبەن ءوزىڭىز بولىپ كورىنەتىنىڭىزدى ايتتى ما؟
باسقالار ءسىزدى مەنمەنشىل دەپ ساناي ما؟
ەگەر ءسىز بارىنە «ءيا» دەپ جاۋاپ بەرگەن بولساڭىز، ءسىزدى رەنجىتۋ وڭاي. دەگەنمەن، رەنىشتەرگە شىداپ، ولاردى جيناپ ءجۇرۋ پايدالى ادەت ەمەس. جوعارى سەزىمتالدىق كوڭىل- كۇيدى عانا ەمەس، ءومىردى دە بۇزادى. ءبىر جاقسىسى مۇنداي ادەتتەن ارىلۋعا بولادى.
قالاي رەنجىمەۋگە جانە كەشىرۋگە بولادى؟
1. رەنجىگەنىڭىزدى مويىنداڭىز.
2. «مەن رەنجىگەن كەزدە سابىرلىمىن» دەگەن مانترانى ويشا قايتالاي وتىرىپ، بىرنەشە تەرەڭ تىنىس الىڭىز. پايدا بولعان ەموتسيالاردى باسۋعا تىرىسپاي، بارىمەن قابىلداڭىز. ولار ءسىزدىڭ ءبىر بولىگىڭىز ەكەنىن جانە ءسىز باسقاشا ارەكەت ەتە المايتىنىڭىزدى مويىنداڭىز. اشۋ، ىزا سىندى كەز كەلگەن ەموتسيانى تەجەمەڭىز.
3. رەنجىتكەن ادام تۋرالى ويلاڭىز. ايتىلعان/ىستەلگەن نارسە ادەيى بولدى ما، الدە كەزدەيسوق بولدى ما؟ ءوزىڭىزدى ونىڭ ورنىنا قويىڭىز. مۇمكىن ول وتباسىنداعى قيىندىقتارعا، جۇمىستاعى نەمەسە دەنساۋلىعىنا بايلانىستى قيىندىقتار سەبەبىنەن سولاي جاساعان شىعار. نەمەسە جاي قالاعانىن دۇرىس جەتكىزبەي، ءسوز تابا المادى؟ نەمەسە ونىڭ سويلەۋ مانەرى سونداي تىك بولۋى مۇمكىن عوي.
4. وزىڭىزگە سۇراق قويىڭىز: «مەن نەگە رەنجىدىم؟ مەن نە نارسەگە رەنجىدىم؟» رەنىش وبەكتيۆتى بولۋى مۇمكىن. مىسالى، قورلاۋعا رەاكسيا رەتىندە. نەمەسە ويدان شىعارىلعان. وندايدا ەگوسەنتريزمدى ءوشىرىپ، جاعدايدى قيىنداتپاڭىز.
5. اركىمنىڭ ءوز پىكىرىن ايتۋعا قۇقىعى بار ەكەنىن ەسكە ءتۇسىرىڭىز، ءسىزدىڭ دە قۇقىعىڭىز بار. رەنجۋدىڭ ورنىنا، باسقا بىرەۋدىڭ پىكىرىن ءوز پايداڭىزعا اينالدىرۋعا تىرىسىڭىز. سىننان ادام شىڭدالا تۇسەدى.
6. اڭگىمەنىڭ پارقىنا بويلاماي كوپشىلىك بىرەۋدىڭ ءسوزىن تىم جاقىن قابىلداپ، جامان پيعىلمەن ايتتى دەپ ويلاۋعا بەيىم.
7. وزىڭىزگە قاتىستى ادىلەتسىز ءسوز نە ارەكەت جاسالعانىن ءتۇسىنىپ وتساڭىز، بىردەن اشۋعا بەرىلىپ ايقاي- شۋ شىعارماڭىز. رەنىشى سۋىماعان اڭگىمەدەن جانجال شىعادى. رەنجىتكەن كىسىنى ديالوگقا شاقىرماس بۇرىن كەم دەگەندە 24 ساعات كۇتىڭىز.
رەنجۋدى قويۋ ءۇشىن ەشكىم ءمىنسىز ەمەس ەكەنىن ۇعۋ كەرەك. ەگەر ءسىز باسقالار دا ءسىز سياقتى مەيىرىمدى ءارى جاناشىر بولادى دەپ ويلاساڭىز، ءجيى وپىق جەپ، رەنىشكە بوي الدىرۋعا سەبەپ تاباسىز.
massaget.kz