فوتوجۋرناليست مەركىدەگى بالبالداردى مەملەكەت قامقورلىعىنا الۋدى ۇسىندى
قازاقپارات ءتىلشىسى ماسەلەنىڭ ءمان- جايىن فوتو اۆتورىنىڭ وزىنەن ءبىلىپ كوردى.
«بالبالداردىڭ كەيبىرىنە جويىلۋ قاۋپى ءتونىپ تۇر. قۇرتىلىپ، سىنىقتارى شاشىلىپ جاتقان بىرنەشە بالبالدى العاش ينتەرنەتتەن كورگەن بولاتىنمىن. ينتەرنەتتى اقتارىپ ءجۇرىپ سونداي ءۇش بالبالدى تاۋىپ الدىم. بىرەۋى عانا ءبۇتىن ەكەن. ونىڭ جانىندا باسى جۇلىنعان ەكى بالبال جاتتى.
جولى قيىن بولعاندىقتان كوپ ادام بۇل جەردى بىلە بەرمەيدى. مەركى كونە عيباداتحانا رەتىندە تىركەلگەندىكتەن مەملەكەتتىك ەسكەرتكىش بولىپ ەسەپتەلەدى. بۇل جەردە عالىمدار قازبا جۇمىستارىن جۇرگىزگەن سياقتى. كەيىن اياقتالماي قالعانداي. مۇندا العاش رەت بىلتىر بولعانمىن. «پەتروگليف ىزدەۋشىلەر» ۇيىمىنىڭ جەتەكشىسى ولگا گۋميروۆا استاناعا بارىپ، شاتقالدى قورعاۋ ماسەلەسىن ءماجىلىس قابىرعاسىندا كوتەردى. ەندى الماتىعا بارىپ، وسى ماسەلەنمەن اينالىسامىن»، - دەيدى فوتوجۋرناليست.
ونىڭ ايتۋىنشا، بالبالداردى كىم قيراتقانى، قاشان قيراتقانى بەلگىسىز.
«بىرەۋلەر بالبالداردى قازىپ الىپ، مۇراجايعا قويۋ كەرەك دەيدى. ءبىراق بالبالدىڭ ورنى - تابيعات. ال جاپان تۇزدە ولاردىڭ اربىرىنە كۇزەتشى بەكىتىپ قويۋ تاعى مۇمكىن ەمەس. جىل سايىن ساناق جاساپ، قاداعالاپ، كارتاسىن جاساۋ ەڭ وڭتايلى جولى شىعار. ايىنا ءبىر رەت بارىپ، باقىلاپ وتىرۋعا قاراجات كەرەك. ءبىراق ەسكەرتكىش وعان تۇرارلىق. تۋريستىك ورىن رەتىندە دامىتۋدىڭ رەتى كەلمەيتىن سياقتى. ويتكەن تۇمسا تابيعات ادام اياعى تيمەستەن ساقتالسا، دۇرىس ەدى»، - دەيدى سەرگەي الەكسەيەنوك.
قازاق گەوگرافيالىق قوعامىنىڭ سايتىنداعى مالىمەتكە سۇيەنسەك، مەركى قورىعىنداعى بالبالدار يۋنەسكو- نىڭ بۇكىلالەمدىك مۇرا تىزىمىنە ەنگىزىلگەن. ارحەولوگتار مەركە عيباداتحاناسىن ءبىزدىڭ زامانىمىزدىڭ VI عاسىرىنا جاتقىزادى. ول كەزدە ءبىرىڭعاي تۇركى قاعاناتىنىڭ ورتالىعى بولعان. ۆيزانتيا ەلشىلەرى ەجەلگى تارازدا ەستەمي قاعاننىڭ ورداسى بولعانىن، ال تاۋدا ءدىني ءراسىم وتكىزەتىن ورىندار بولعانىن جازىپ قالدىرعان.
فوتو: سەرگەي الەكسەەنوك