بۇل تۋرالى قازاقپارات تىلشىسىنە «الماتى قالاسى مۇراجايلار بىرلەستىگى» ك م ق ك ديرەكتورى ءلاززات ساعىندىقوۆا ايتتى.
سپيكەردىڭ ايتۋىنشا 16-قازاندا الاتاۋ اۋدانى اۋماعىنداعى ەرتە تەمىر ءداۋىرىنىڭ اپاتتىق قورعاندارىندا ارحەولوگيالىق قازبا جۇمىستارى تابىلدى.
«جەرلەۋ ورنىندا التىنمەن بەزەندىرىلگەن جاۋىنگەردىڭ قارۋ-جاراعى، قىلىشتىڭ سىنىقتارى، التىنمەن قاپتالعان اڭ ستيلىندە جاسالعان بەينەلەرى بار، كيىمگە ارنالعان جاپسىرمالار مەن كۇمىس بۇيىمدار تابىلدى. جاۋىنگەر سۇيەگى 3 مەتردەن استام تەرەڭدىكتە ورنالاسقان اعاش جاشىككە سالىنعان»، - دەدى ءلاززات ساعىندىقوۆا.
الماتى قالاسى مۇراجايلار بىرلەستىگىنىڭ اعا عىلىمي قىزمەتكەرى مۇرات نۇرپەيىسوۆ قورىمنان تابىلعان زاتتارعا قاتىستى ءوزىنىڭ تۇجىرىمىن ايتتى.
«ول ەر ادام، ءبىراق، جاس بولماعان. باس سۇيەگىنە قاراعاندا، سولاي توپشىلاۋعا بولادى. سونداي-اق ونىمەن بىرگە پاتشانىڭ ەمەس، جاۋىنگەردىڭ زاتتارى جەرلەنگەن. الايدا ول تەكتى اۋلەتتەن شىققانى بايقالادى»، - دەدى مۇرات نۇرپەيىسوۆ.
ول سونداي-اق الاتاۋ اۋدانىنداعى قورعاندار 1960-جىلداردىڭ سوڭىنان بەلگىلى بولا باستاعانىن ايتتى.
«مۇندا 9 ساق قورعانى تابىلعان. قازىر تەك 4 قورعان قالدى. قازىرگى ارحەولوگيالىق قازبا جۇمىستارى ارنايى اپاتتىق قورعاندارىنا جۇرگىزىلەدى»، - دەپ تولىقتىردى ول.