پەتروپاۆلداعى ۇكىلى ىبىراي ەسكەرتكىشىنىڭ تۇبىنەن ور قازعان كىم؟
ءدال تۇبىنەن ور قازىلىپ، اينالاسىنداعى قورشاۋى الىنعان، دەپ جازدى Aikyn.kz باسىلىمى.
بۇل اۋماقتاعى جەر مەملەكەتتىڭ ەمەس، جەكە كاسىپكەردىڭ مەنشىگىندە. سپارتاك باساعارينوۆ ەسىمدى كاسىپكەر ازامات بۇل اۋماقتاعى باسپاحانانىڭ ەسكى عيماراتىنىڭ ورنىنا ساۋدا-اكىمشىلىك ورتالىعىن اشىپ، ماڭايىن اباتتاندىراتىنىن ايتىپ وتىر.
«ءبىز بۇل اۋماقتىڭ بارلىعىن، سونىڭ ىشىندە ەسكەرتكىشتىڭ ماڭايىن كوركەيتەمىز. ۇكىلى ىبىرايدىڭ ەسكەرتكىشى قالتارىستاۋ جەردە، كولەڭكەدە ورنالاسقان، ەلەۋسىزدەۋ جەردە تۇر. ءبىز كەرىسىنشە، ەسكى اعاشتاردى كەسىپ، بۇل جەردى اشىپ، جارىقتاندىرامىز. ەسكەرتكىشتىڭ اينالاسىنداعى اعاشتار مەنىڭ جەرىمدە ورنالاسقان، ال ەسكەرتكىش تۇرعان جەرگە مەنىڭ قاتىسىم جوق. مۇسىنگە جاپسارلاس جەردىڭ بارلىعىن كوركەيتەتىنىمىز تۋرالى قالانىڭ دا، وبلىستىڭ دا اكىمىنە ەسەپ بەردىك»، - دەيدى كاسىپكەر.
دەگەنمەن، جەرگىلىكتى تۇرعىندار ەسكەرتكىشتى باسقا جەرگە كوشىرەدى نە مۇلدە الىپ تاستايدى دەپ الاڭداۋلى. ەل اراسىندا «جەر يەسى قالالىق اكىمدىككە بارىپ، ەسكەرتكىش ءمۇسىندى باسقا جاققا اۋىستىرۋ تۋرالى ءوتىنىش ايتىپتى» دەگەن سىبىس تاراپ ۇلگەرگەن.
الايدا سولتۇستىك قازاقستان وبلىستىق مادەنيەت، تىلدەردى دامىتۋ جانە ارحيۆ باسقارماسىنىڭ مامانى دينارا بۇركىتالىموۆا ۇكىلى ىبىراي ءمۇسىنىنىڭ جەرگىلىكتى ماڭىزى بار ەسكەرتكىشتەردىڭ تىزىمىنە ەنگىزىلمەگەنىن مالىمدەدى.
«ءبىز وبلىس اكىمىنىڭ قاۋلىسىمەن جانە ءمينيستردىڭ بۇيرىعىمەن بەكىتىلگەن رەسپۋبليكالىق تىزىمگە ەنگىزىلگەن ەسكەرتكىشتەردىڭ جاي-كۇيىنە عانا مونيتورينگ جۇرگىزەمىز. وبلىس اۋماعىندا جەرگىلىكتى ماڭىزعا يە 598 ەسكەرتكىش بار. وبلىس اۋماعىندا جانە ورتالىعىندا بۇل تىزىمدەرگە ەنگىزىلمەگەن ەسكەرتكىش وتە كوپ. ۇكىلى ىبىراي ەسكەرتكىشى - سولاردىڭ ءبىرى»، - دەپ ءتۇسىندىردى دينارا بۇركىتالىموۆا.
ال پەتروپاۆل قالالىق مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمىنىڭ باسشىسى ءاليا بەيسەنوۆا بۇل ماسەلە بويىنشا قالالىق اكىمدىككە رەسمي حات كەلىپ تۇسپەگەنىن ايتىپ، ۇكىلى ىبىراي ەسكەرتكىشىن كوشىرۋ تۋرالى ماسەلە كۇن تارتىبىنە شىقپاعانىنا سەندىردى.