بۇل تۋرالى ماجىلىستەگى ۇكىمەت ساعاتىنان كەيىنگى باسپا ءسوز ءماسليحاتىندا اتالعان ۆەدومستۆونىڭ باسشىسى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.
«قازىرگى كەزدە بۇل جوبا تولىقتاي جەرگىلىكتى اتقارۋشى ورگاننىڭ، ياعني استانا قالاسى اكىمدىگىنىڭ قاراۋىندا. اكىمدىكتىڭ جاۋاپكەرشىلىگىندە تۇر. ەگەر جوبانى مينيسترلىككە تاپسىرسا، وندا LRT قۇرىلىسى بويىنشا ناقتى جۇمىس الگوريتمىن جاريالايمىن. ازىرگى ماعان بۇل باعىتتا تاپسىرما جۇكتەلمەدى»، - دەدى ق. وسكەنبايەۆ.
بۇدان بۇرىن حابارلانعانداي، بيىل قىركۇيەك ايىندا ق ر قارجى ۆيتسە-ءمينيسترى تاتيانا ساۆەليەۆا ەلوردالىقتاردى الاڭداتقان LRT قۇرىلىسىنا قارجى قايدان بولىنەتىنىن ايتتى.
«اقشا ۇكىمەت رەزەرۆىنەن بولىنبەيتىن شىعار. يندۋستريا جانە ينفراقۇرىلىمدىق دامۋ مينيسترلىگى بويىنشا بيۋدجەتتىك باعدارلامالار قايتادان بولىنەدى. ءتيىستى ترانسفەرتتەر قوسىلادى. مۇنىڭ ءبارى كەلەسى جىلى بيۋدجەتتى ناقتىلايتىن كەزدە بولادى. بارلىق قۇجاتتاما قاجەتتى پروتسەدۋرالاردان ءوتتى. ءبىرقاتار كورسەتكىش قايتا قارالدى. زاڭنامانىڭ بۇكىل تالابى ساقتالدى. قازىر پىسىقتالىپ جاتىر»، - دەدى ۆيتسە- مينيستر.