مەكتەپتە ۇيرەتكەن بۇرىس نارسەلەر

استانا. قازاقپارات - نەگە ەكەن بەلگىسىز، كوپشىلىگىمىز مەكتەپ جىلدارىن ەسكە العاندا، العان ءبىلىمىمىزدى ەمەس، قاتاڭدىقتى، قۇرمەتسىزدىك پەن سوگىستى ەسكە الامىز.

ءتىپتى، ءبىر كەزدەرى ساباققا دەگەن قىزىعۋشىلىقتىڭ بولماۋى دا وسىنداي جاعىمسىز جايتتارمەن بايلانىستى ما دەپ تە قالامىز. ارينە، بارلىق مۇعالىم وقۋشىلارعا «ناشار ۇلگى» بولمادى. ءبىراق مەكتەپتەن بويعا سىڭىرگەن كەي داعدىلار بار.

وقۋشىنىڭ جەكە پىكىرى ماڭىزدى ەمەس

كەي مۇعالىم ءوزىنىڭ ويىن عانا بالاعا دۇرىس دەپ ءتۇسىندىرىپ، ونىڭ جەكە پىكىرىمەن ساناسقىسى كەلمەيدى. مىسالى كەي ادەبي شىعارمادان ءمان ىزدەپ، ونى وقۋشىعا اۆتور وسىلاي جەتكىزگىسى كەلدى دەپ تۇسىندىرەدى. ءبىراق بالا ونى وقىعاندا مۇلدە باسقا نارسە ءتۇسىنۋى مۇمكىن. سول سەبەپتى مەكتەپتە بالانىڭ ويىنا دا ءمان بەرۋ كەرەك.

باعا ماڭىزدى

باعا ارقىلى بالانىڭ بولاشاعىن ايقىندايدى. ەگەر 3 السا، ول بالانىڭ بولاشاعى بۇلىڭعىر. وسىنداي ستەرەوتيپ مەكتەپ قابىرعاسىندا قالىپتاسقانى جاسىرىن ەمەس. ءبىراق بالانىڭ بولاشاعىن باعا ەمەس، ونىڭ تالپىنىسى ايقىندايدى.

تەك ۇلكەندەردى تىڭداۋ

قارسى سويلەمەۋ جانە ولاردىڭ ايتقانىنىڭ ءبارى دۇرىس. ءبىراق ەرەسەك ادام بولعانىمەن، سانالى ادام بولماۋى مۇمكىن. بالا نەنىڭ دۇرىس، نەنىڭ بۇرىس ەكەنىن ەرتە جاستان انىقتاپ ءبىلۋ كەرەك. بالانىڭ ءىسى دۇرىس بولسا دا، جاسىنا بولا سوگىس ەستىسە، ەرەسەكتەرگە دەگەن سىيلاستىق بولمايدى.

وقۋ ەمەس، سىرت كەلبەت ماڭىزدى

بويالعان شاش پەن تىرناق، جىبەرىلگەن شاش، ءتىپتى كەي مەكتەپتە قىزداردىڭ كلاسسيكالىق شالبار كيگەنى ءۇشىن ۇرىس ەستىگەنى بار. ءبىراق ول ادامنىڭ ءوزىن-ءوزى قوعامعا كورسەتۋى. مەكتەپتە ەرەجە بار، ءبىراق ول بالا قۇقىعىن تاپتاماۋى ءتيىس.