بۇگىن ورتالىق سايلاۋ كوميسسياسىنىڭ كەزەكتى وتىرىسىندا 20- قاراشادا وتەتىن ق ر پرەزيدەنتى سايلاۋىنا ۇمىتكەر مەيرام قاجىكەننىڭ كانديداتۋراسىنىڭ زاڭ تالاپتارىنا ساي كەلەتىنى جانە ونى كانديدات رەتىندە تىركەۋ ماسەلەسى قارالدى.
«اۋماقتىق سايلاۋ كوميسسيالارىنىڭ حاتتامالارىنا سايكەس ق ر پرەزيدەنتتىگىنە كانديدات مەيرام قاجىكەندى قولداۋ ماقساتىندا ەلىمىزدىڭ 14 وڭىرىندە 122184 ازاماتتىڭ قولى جينالدى. ونىڭ بارلىعى تەكسەرىلدى، سونىڭ ىشىندە كانديداتتى قولداعان 120055 قول سەنىمدى دەپ تانىلدى»، - دەدى ورتالىق سايلاۋ كوميسسياسىنىڭ مۇشەسى شاۆكات وتەمىسوۆ.
سونداي-اق، ۇمىتكەردىڭ قۇجاتتاردى ۋاقىتىلى تاپسىرعانى جانە ولاردىڭ تالاپقا ساي كەلەتىنى ايتىلدى.
«قۇرمەتتى جيىنعا قاتىسۋشىلار، وسىلايشا ورتالىق سايلاۋ كوميسسياسى قاجىكەن مەيرام زەكەش ۇلىن ق ر پرەزيدەنتىنە كانديدات رەتىندە تىركەدى»، - دەدى ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ.
ودان بولەك، جيىن سوڭىندا و س ك ءتوراعاسى مەيرام قاجىكەنگە كانديدات كۋالىگىن تابىس ەتتى.
ەسكە سالساق، 4- قازاندا ورتالىق سايلاۋ كوميسسياسىنا پرەزيدەنت سايلاۋىنا كانديدات رەتىندە ۇسىنىلعان مەيرام قاجىكەننىڭ قۇجاتتارى تاپسىرىلدى.
ال 8- قازان كۇنى ۇمىتكەر مەملەكەتتىك ءتىلدى مەڭگەرۋ دەڭگەيى بويىنشا ەمتيحان تاپسىرىپ، ودان ءساتتى ءوتتى.
ايتا كەتەيىك، مەيرام قاجىكەن كانديدات رەتىندە «امانات» قازاقستان كاسىپوداقتار دوستاستىعى» رەسپۋبليكالىق بىرلەستىگى اتىنان ۇسىنىلىپ، تىركەلدى.