ازىق-تۇلىك جانە اۋىلشارۋاشىلىق ۇيىمى مەن دۇنيەجۇزىلىك ازىق-تۇلىك باعدارلاماسىنىڭ سوڭعى مالىمەتتەرىنە سايكەس 4,7 ميلليون گايتيلىك ازىق-تۇلىك تاپشىلىعىن سەزىنۋدە.
ەل استاناسى پورت-و-پرەنستىڭ ءبىرقاتار اۋداندارىندا قارۋلى باندىلار شابۋىلى ۇدەپ تۇر. ادامدار كوشەگە شىعۋعا قورقادى، جۇمىسقا نەمەسە بازارعا دا بارا المايدى. گايتي ەكونوميكاسى تولىعىمەن قۇلدىراپ، ەل ىشىندە حاوس ورنادى.
ينفلياتسيا 33 پايىزدى قۇراپ، جانارماي قۇنى ەكى ەسەگە ءوستى.
«دۇنيەجۇزىلىك ازىق-تۇلىك باعدارلاماسى گايتي حالقىن بۇل جاعدايدا قالدىرمايدى جانە ەڭ وسال جانە كەدەي ادامدارعا كومەكتەسۋدى جالعاستىرادى، - دەدى گايتيدەگى دۇنيەجۇزىلىك ازىق-تۇلىك باعدارلاماسى كەڭسەسىنىڭ باسشىسى جان مارتين باۋەر. - ءبىز مەكتەپ وقۋشىلارىنىڭ كۇن سايىن قۇنارلى تۇسكى اس ءىشۋىن، وتباسىلاردى نەگىزگى ازىق-- تۇلىكپەن قامتاماسىز ەتۋ ءۇشىن جۇمىس ىستەپ جاتىرمىز».
اۋىر جاعدايعا قاراماستان، دۇنيەجۇزىلىك ازىق-تۇلىك باعدارلاماسى بيىلعى جىلى 100 مىڭ گايتيلىككە كومەك كورسەتتى جانە ازىق-تۇلىك قاۋىپسىزدىگىن نىعايتۋعا كومەكتەسۋدە.
وسى ماڭىزدى جۇمىستى جالعاستىرۋ ءۇشىن بۇكىلالەمدىك ازىق-تۇلىك باعدارلاماسىنا الداعى التى ايدا 105 ميلليون دوللار قاجەت.
ازىق-تۇلىك جانە اۋىلشارۋاشىلىق ۇيىمى شاعىن فەرمەرلەرگە قولداۋ كورسەتۋدە، ونىڭ ىشىندە 70 مىڭعا جۋىق ادام وسى كۇزدە اۋىلشارۋاشىلىق وندىرىسىنە بايلانىستى اقشالاي جانە باسقا دا كومەكتەر الادى.
يۋنيسەف بەس جاسقا تولماعان 100 مىڭعا جۋىق بالانىڭ ومىرىنە قاۋىپ ءتونىپ تۇرعانىن ەسكەرتەدى. ولار دۇرىس تاماقتانباۋدان السىرەگەن جانە كەز كەلگەن ينفەكسياعا وسال، جانە بۇل جاعداي تىرىسقاق ىندەتى كەزىندە وتە قاۋىپتى.
«گايتيدەگى داعدارىس بالالار داعدارىسىنا اينالىپ بارادى. تىرىسقاق جۇقتىرعان ءاربىر ءۇشىنشى ادام - بەس جاسقا تولماعان بالا»، - دەدى يۋنيسەفتىڭ ەلدەگى وكىلى برۋنو ماەس.