«قازىرگى الەمدە اقپاراتتىق كەڭىستىكتەگى كەلەڭسىز جايتتاردىڭ الدىن الۋ جونىندەگى ءوزارا ءىس- ارەكەتتەردىڭ ماڭىزى ارتىپ كەلەدى. سيفرلىق تەحنولوگيالاردىڭ، الەۋمەتتىك جەلىلەر مەن مەسسەندجەرلەردىڭ قارقىندى دامۋى جاعدايىندا ورىنسىز ايتىلعان كەز كەلگەن ءسوز، اسىرەسە جاستار اراسىندا وشپەندىلىك پەن ەتنوسارالىق ارازدىق تۋعىزۋى مۇمكىن»- دەدى پرەزيدەنت.
مەملەكەت باسشىسىنىڭ ايتۋىنشا، وسىندا جايتتاردىڭ سالدارىنان قوعامداعى بىرلىك پەن كەلىسىمدى نىعايتۋعا باعىتتالعان كوپ جىلعى كۇش- جىگەر زايا كەتەدى.
«داۋ- جانجال مەن دۇربەلەڭدى بولدىرماۋ ءۇشىن سالالىق ۆەدومستۆولارىمىز بەن قوعامدىق ۇيىمدارىمىز تىعىز ىنتىماقتاستىق ورناتىپ، ءتۇسىندىرۋ جۇمىستارىن بارىنشا بەلسەندى جۇرگىزۋگە ءتيىس. كوپ نارسە ءبىزدىڭ مەملەكەت قايراتكەرلەرىمىزدىڭ ساياسي جاۋاپكەرشىلىگىنە دە بايلانىستى. وكىنىشكە قاراي، كەيبىر ەلدەردە سەرىكتەس مەملەكەتتەرگە قاتىستى ارانداتۋشىلىق سيپاتتاعى سوزدەر ايتىلىپ ءجۇر. مۇنداي جاعداي اشۋ- ىزا تۋعىزاتىنى زاڭدىلىق جانە دەسترۋكتيۆتى كۇشتەر ءۇشىن ۇتىمدى بولماق»، - دەدى قاسىم- جومارت توقايەۆ.
بۇل كەزدەسۋگە قازاقستان، قىرعىزستان، وزبەكستان، تاجىكستان، تۇرىكمەنستان جانە رەسەي پرەزيدەنتتەرى كەلدى، ولار التىجاقتى فورماتتاعى ىنتىماقتاستىقتىڭ كەلەشەگىن تالقىلايدى.
كەزدەسۋ قورىتىندىسى بويىنشا مەملەكەت باسشىلارىنىڭ بىرلەسكەن مالىمدەمەسىن قابىلداۋ جوسپارلانعان، وندا ەۋرازيالىق كەڭىستىكتەگى وڭىرلىك ىنتىماقتاستىقتىڭ وزەكتى ماسەلەلەرى كورسەتىلەدى.