ونىڭ سوزىنشە، ازەربايجان الەمدەگى ەڭ كوپ مينا قويىلعان ەلدىڭ ءبىرى. ارمەنيا وككۋپاتسيا كەزەڭىندە ايماققا 1 ميلليون جارىلعىش زات قويىپ كەتكەن دەپ مالىمدەدى. ەكىنشى قاراباق سوعىسىنان كەيىنگى 2 جىلدىڭ ىشىندە 250 ادام وسى مينالارعا ءتۇسىپ جارالانعان نەمەسە مەرت بولعان. مامانداردىڭ ەسەبىنە سايكەس، بۇل ماسەلەنى شەشۋ ءۇشىن ازەربايجان ەلىنە 25 ميلليارد ا ق ش دوللارى جانە 30 جىل ۋاقىت كەرەك ەكەن.
يلحام اليەۆ، ازەربايجان رەسپۋبليكاسىنىڭ پرەزيدەنتى:
بۇگىندە ازەربايجان قاراباق جەرىندە اۋقىمدى قۇرىلىس جۇمىستارىن جۇرگىزىپ جاتىر. سونىمەن قاتار ايماقتان كوشۋگە ءماجبۇر بولعان ازاماتتاردى قايتا قونىستاندىرۋ باعدارلاماسىن قابىلدادىق. بۇل جوبانى ءبىز «ۇلى كوش» دەپ اتادىق. حالقىمىزىڭ 30 جىل بويى شەككەن زاردابىنا قاراماستان ءبىز ارمەنياعا ءوزارا تەرريتوريالىق تۇتاستىعىمىزدى مويىنداۋدى كوزدەيتىن بەيبىت كەلىسىم ۇسىندىق.
ال رەسەي پرەزيدەنتى ۆلاديمير پۋتين بۇگىنگى كەزدەسۋ جاھاندىق ساياسات پەن ەكونوميكاداعى ۇلكەن وزگەرىستەر اياسىندا ءوتىپ جاتقانىن ايتتى. الەم شىن مانىندە كوپ پوليارلى بولىپ كەلەدى، وسى رەتتە ازيانىڭ ءرولى وتە ماڭىزدى دەيدى ول. ونىڭ سوزىنشە، وڭىردە اشارشىلىق پەن الەۋمەتتىك ماسەلەلەر وزەكتى بولىپ بارادى. وسى رەتتە رەسەي تاراپى ساۋدا- ساتتىققا كەدەرگى كەلتىرەتىن ەكونوميكالىق كەدەرگىلەردى الىپ تاستاۋ كەرەك دەگەن پىكىردە.
ۆلاديمير پۋتين، رەسەي فەدەراتسياسىنىڭ پرەزيدەنتى:
ءبىرىنشى قادام رەتىندە ءبىز ءوزارا ەسەپ ايىرىسۋدا ۇلتتىق ۆاليۋتالاردى بەلسەندىرەك پايدالانۋدى دۇرىس دەپ ەسەپتەيمىز. مۇنداي شارالار مەملەكەتتەرىمىزدىڭ قارجىلىق ەگەمەندىگىن نىعايتۋعا، ىشكى كاپيتال نارىقتارىن دامىتۋعا جانە ايماقتىق ەكونوميكالىق ينتەگراتسيانى تەرەڭدەتۋگە ىقپال ەتەتىنى ءسوزسىز. جالپى العاندا، كەزدەسۋدەگى بىرلەسكەن جۇمىستى جاقسى دامىپ كەلە جاتقانىن ايتا الامىن. رەسەي وسى كەزدەسۋگە قاتىسقان بارلىق ەلدەرمەن ىنتىماقتاستىقتى دامىتۋدى جالعاستىرادى. ءبىز ءتوراعا رەتىندەگى قازاقستاننىڭ باستامالارىن قولدايمىز.
https://qazaqstan.tv