ءبىرتانوۆ ەكى ءىس بويىنشا ايىپتالىپ وتىر.
بىرىنشىدەن، ءبىرتانوۆ پەن ونىڭ بۇرىنعى ورىنباسارى ولجاس ابىشيەۆكە دەنساۋلىق ساقتاۋ مينيسترلىگى جۇمىس ىستەمەيتىن اقپاراتتاندىرۋ پلاتفورماسىن جۇمىسقا قابىلداۋ جانە پايدالانۋعا بەرۋ ارقىلى لاۋازىمدىق وكىلەتتىكتەرىن اسىرا پايدالاندى دەگەن ايىپ تاعىلعان.
ەكىنشىدەن، ءبىرتانوۆقا 2020-جىلعى ماۋسىمدا تارازدان COVID-19 جۇقتىردى دەگەن كۇدىكپەن استاناعا جەتكىزگەن كەزدە ساناۆياتسيا بورتىن پايدالاندى دەگەن ايىپ تاعىلعان.
«سوت تەرگەۋى بارىسىندا پلاتفورماعا قاتىستى ءارى سانيتارلىق اۆياتسياعا قاتىستى مەنى ايىپتايتىن ەشقانداي دالەل كەلتىرىلگەن جوق. قىلمىس تۋرالى دەرەكتەر ۇسىنىلمادى. سونىڭ ىشىندە لاۋازىمدىق مىندەتتەرىمدى تەرىس پايدالانۋ تۋرالى - قانداي لاۋازىمدىق مىندەتتەردى تەرىس پايدالاندىم، قانداي فورمادا پايدالاندىم دەگەن نارسەلەر ۇسىنىلمادى. ايىپتى جاريالاعان كەزدە ءتۇسىندىرىلۋىن سۇرادىم. نورماتيۆتىك-قۇقىقتىق بازادا بەكىتىلگەندەردىڭ ىشىنەن دەنساۋلىق ساقتاۋ ءمينيسترىنىڭ وكىلەتتىگىن ايىپتاۋ كەزىندە وسى تارماقتاردىڭ ەشقايسى ناقتى قاي قۇقىقتى دۇرىس پايدالانباعانىمدى كورسەتپەيدى»، - دەدى ەكس-مينيستر.
ەلجان ءبىرتانوۆ بۇل ءىس بويىنشا بارلىق بۇيرىققا ءوزىنىڭ لاۋازىمدىق مىندەتتەرىنە سايكەس قول قويعانىن مالىمدەدى.
«ايىپتاۋ اكتىسىندە باستاپقىدا مەملەكەتتىك قىزمەتشىنىڭ يميدجىن جاساۋ ماقساتى مالىمدەلگەن بولسا، جەكە قىزىعۋشىلىعىم قانداي بولعانى تۋرالى نەگىزدەمە ۇسىنىلمادى. مەنىڭ ويىمشا، مەملەكەتتىك ايىپتاۋ ءىس ماتەريالدارىندا بۇل راستالمادى. ياعني، پلاتفورما ىسىندەگى جانە ساناۆياتسيا ىسىندەگى مەنىڭ ماقساتىم تۋرالى ەشقانداي دالەل كەلتىرىلگەن جوق. ءىس جان-جاقتى ەمەس، ياعني قىلمىستىڭ ەگجەيى-تەگجەيى جوق. بۇيرىقتارعا قول قويعانىم ايىپتالدى، بولدى. شىن مانىندە، باسقا وقيعالارعا قاتىسىم جوق، باسقا ارەكەتتەر جاسامادىم»، - دەدى ءبىرتانوۆ.
ساناۆياتسياعا قاتىستى جاعدايدى تۇسىندىرگەن ءبىرتانوۆ سول ساتتە ءوزىنىڭ جاعدايىنىڭ ناشارلاعانىن سەزگەنىن مالىمدەدى. ول استاناعا ۇكىمەتتىك بورتپەن ۇشۋى كەرەك ەدى، ءبىراق ول كەزدە پرەمەر-مينيسترمەن، ۇكىمەتتىڭ قالعان مۇشەلەرىمەن بايلانىسۋعا ءماجبۇر بولار ەدى. ءبىرتانوۆتىڭ ايتۋىنشا، ول ارىپتەستەرىنە اۋرۋ جۇقتىرۋدان قورىققان، سوندىقتان ول وقشاۋلانىپ، ساناۆياتسيا بورتىن شاقىرتقان.
«ۇكىمەتتىك ۇشاق الدەقايدا ىڭعايلى. ۇكىمەتتىك دەلەگاتسيا قۇرامىندا ءوز بەتىنشە ۇشىپ كەتۋ ادەتى جوق. ءتىپتى مۇمكىن ەمەس. پرەمەر-ءمينيستردىڭ قاراماعىندا بورتتا كىم ۇشاتىنى جانە كىم ورالاتىنى ناقتى جازىلعان. بۇلاي ۇشۋ قىلمىس ەمەس. ول ءۇشىنشى تۇلعالاردى قورعاۋ ماقساتىندا مەملەكەت مۇددەسى ءۇشىن جۇزەگە اسىرىلدى»، - دەدى بۇرىنعى مينيستر.
سوتتا ءبىرتانوۆ كەلتىرىلگەن زالالمەن كەلىسپەيتىنىن مالىمدەدى.
«مەنىڭ ويىمشا، پلاتفورما ءىسى بويىنشا ەشقانداي زالال كەلتىرىلگەن جوق. پلاتفورما باعالانعان قۇنىنا سايكەس، ليتسەنزيا مەن جۇمىس دەنساۋلىق ساقتاۋ مينيسترلىگىنىڭ بالانسىنا ماتەريالدىق ەمەس اكتيۆ رەتىندە قابىلداندى. جۇمىستار ءوز دەڭگەيىندە ورىندالدى»، - دەدى ول.
ايتا كەتەيىك، 2020-جىلعى 25- ماۋسىمدا ەلجان ءبىرتانوۆ دەنساۋلىق ساقتاۋ ءمينيسترى قىزمەتىنەن بوساتىلدى. دەنساۋلىق ساقتاۋ مينيسترلىگىنىڭ بۇرىنعى باسشىسى ەلجان ءبىرتانوۆ 2020-جىلعى قاراشادان بەرى ءۇي قاماقتا وتىر.
بۇرىنعى مينيستر ەلجان ءبىرتانوۆ پەن بۇرىنعى ۆيتسە-مينيستر ولجاس ابىشيەۆ دەنساۋلىق ساقتاۋ مينيسترلىگىنىڭ جۇمىس ىستەمەيتىن اقپاراتتاندىرۋ پلاتفورماسىن قابىلداپ، ىسكە قوسۋ ارقىلى قىزمەت بابىن اسىرا پايدالاندى دەگەن كۇدىككە ىلىنگەن ەدى.