پرەزيدەنت سايلاۋى: و س ك تاعى ءبىر ۇمىتكەردى تىركەۋدەن باس تارتتى

استانا. قازاقپارات - ورتالىق سايلاۋ كوميسسياسى ق ر پرەزيدەنتتىگىنە كانديدات رەتىندە ۇسىنىلعان تاعى ءبىر ۇمىتكەردى تىركەۋدەن باس تارتتى.

قۇزىرلى ورگان تالعات ەرعاليەۆتىڭ كانديداتۋراسى تالاپتارعا سايكەس كەلمەيتىنىن انىقتاعان، دەپ حابارلايدى قازاقپارات ءتىلشىسى.

ونىڭ كانديداتۋراسىن «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگى 10-قازاندا ۇسىنعان بولاتىن.

ورتالىق سايلاۋ كوميسسياسىنىڭ حاتشىسى مۇحتار ەرماننىڭ ايتۋىنشا، ۇمىتكەر قازاقستان قۇرىلىسشىلار وداعى جوعارى ورگانى وتىرىسىنىڭ پرەزيدەنتتىككە ۇسىنۋ تۋرالى حاتتاماسىنان ءۇزىندى، ءومىربايان دەرەكتەرى، ورتالىق سايلاۋ كوميسسياسىنىڭ شوتىنا سايلاۋ جارناسىنىڭ ەنگىزىلگەنىن كۋالاندىراتىن قۇجات، جەكە باسىن كۋالاندىراتىن قۇجاتتىڭ كوشىرمەسى جانە جوعارى ءبىلىمى تۋرالى ديپلومىنىڭ كوشىرمەسىن تاپسىرعان.

قابىلدانعان قۇجاتتاردى ارنايى ورگاندار ارقىلى تەكسەرۋ بارىسىندا تالعات فايزۋللي ۇلى ەرعاليەۆتىڭ مەملەكەتتىك قىزمەتتەگى جۇمىس ءوتىلى جەتكىلىكسىز ەكەنى انىقتالعان. ونىڭ مەملەكەتتىك ورگانداردا جۇمىس تاجىريبەسى 3 جىل 4 اي. سونىمەن قاتار، ونىڭ كانديداتۋراسىن زاڭدى ۇيىم ۇسىنعان. تالاپقا سايكەس، ق ر پرەزيدەنتتىگىنە ۇمىتكەر ازامات سايلاۋعا زاڭدى ۇيىم اتىنان تۇسپەۋى ءتيىس.

وسىعان ساي، تالعات ەرعاليەۆ ق ر «سايلاۋ تۋرالى» كونستيتۋتسيالىق زاڭنىڭ 55-بابى 1-تارماعىنىڭ ەرەجەلەرىنە سايكەس كەلمەيدى دەپ تانىلدى. تيىسىنشە، و س ك ۇمىتكەردى تىكەۋدەن باس تارتۋ تۋرالى شەشىم قابىلدادى.