بۇل تۋرالى اقوردادا ءوتىپ جاتقان قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ 4-وتىرىسىندا تۇركيا پرەزيدەنتى رەجەپ تايپ ەردوعان ايتتى، دەپ حابارلايدى قازاقپارات ءتىلشىسى.
«جاڭا عانا وتكەن وڭاشا كەزدەسۋدە قارىم- قاتىناسىمىزدىڭ بارلىق اسپەكتىسى، ايماقتىق جانە جاھاندىق ماسەلەلەر بويىنشا پىكىر الماستىق. ىنتىماقتاستىعىمىزدى بارلىق سالادا ودان ارى نىعايتۋعا كەلىستىك. قازاقستانداعى ينۆەستيتسيامىزدى قوماقتى دەڭگەيگە كوتەرىپ، 4,13 ميلليارد دوللارعا جەتكىزدىك. تۇركيا باسقا ەلدەرگە قاراعاندا تەك ەنەرگەتيكا سالاسىنا عانا ءمان بەرىپ قويماي، قازاقستان ەكونوميكاسىن ءارتاراپتاندىرۋعا جانە جۇمىسپەن قامتۋدى ارتتىرۋعا كومەكتەسىپ وتىر. جۇمىس ورىندارىن اشۋعا كوبىرەك ۇلەس قوسقىسى كەلەتىن كومپانيالارىمىزعا قولداۋ بىلدىرەتىندىگىڭىزگە سەنىمدىمىن»، - دەدى تۇركيا پرەزيدەنتى.
تۇركيا باسشىسى ەكى ەلدىڭ ساۋدا اينالىمىن قىسقا مەرزىمدە 5 ميلليارد دوللارعا، ال ۇزاق مەرزىمدە 10 ميلليارد دوللارعا جەتكىزۋ ماقساتى تۇرعانىن اتاپ ءوتتى.
سونىمەن قاتار ول بىلتىر 58 پايىزدىق وسىممەن باستاپقى مەجە ەڭسەرىلگەنىن، ياعني ساۋدا- ساتتىق 5 ميلليارد دوللارعا جەتكەنىن ايتتى.
«قازاقستاننىڭ كاسپي تەڭىزىندەگى كولىك فلوتىن كۇشەيتۋ جانە ءتۇرلى ەرەكشەلىكتەگى كەمەلەردى شىعارۋ ماقساتىندا كەمە جاساۋ زاۋىتىن سالۋعا كومەكتەسۋگە دە دايىنبىز»، - دەدى رەجەپ تايپ ەردوعان.