اقوردادا قازاقستان مەن تۇركيا اراسىنداعى اسكەري وندىرىستەگى ىقپالداستىق تالقىلانىپ جاتىر
ءىس-شاراعا مەملەكەت باسشىسى قاسىم-جومارت توقايەۆ پەن تۇركيا پرەزيدەنتى رەجەپ تايپ ەردوعان قاتىسۋدا، دەپ حابارلايدى قازاقپارات ءتىلشىسى.
«تۇركيا ەلىنەن قوناقجاي قازاق جەرىنە، اتاجۇرتقا كەلگەن اعايىنعا قۇشاعىمىز قاشان دا ايقارا اشىق. بۇگىن ارداقتى باۋىرىم رەجەپ تايپ ەردوعان مىرزا باستاعان دەلەگاتسيانى قۋانا قارسى الىپ وتىرمىز. قازاقستان مەن تۇركيانىڭ جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ 4-وتىرىسىن اشىق دەپ جاريالايمىن»، - دەدى وتىرىستى اشقان قاسىم-جومارت توقايەۆ.
وسىدان كەيىن مەملەكەت باسشىسى الدىن الا كەلىسىمگە وراي كۇن تارتىبىنە ەنگىزىلگەن ماسەلەلەردى جاريا ەتتى.
«ءبىرىنشى - سىرتقى ساياسات جانە ينۆەستيتسيا سالاسىنداعى ارەكەتتەستىك. ەكىنشى ماسەلە - ساۋدا-ەكونوميكالىق ىنتىماقتاستىق. ءۇشىنشى ماسەلە - كولىك- لوگيستيكا جانە اسكەري ءوندىرىس سالاسىنداعى ىقپالداستىق. ءتورتىنشى - اۋىل شارۋاشىلىعىنداعى ىنتىماقتاستىق»، - دەدى ق ر پرەزيدەنتى.