قازاقستاندىق شاحماتشى دۇنيەجۇزىلىك وليمپيادادا التىن جەڭىپ الدى
22:02, 11 - قازان 2022
استانا. قازاقپارات - جاس شاحماتشى ساۋات نۇرعاليەۆ 1-11- قازان ارالىعىندا ازەربايجاندا وتكەن 16 جاسقا دەيىنگى جاس وسپىرىمدەر اراسىنداعى دۇنيەجۇزىلىك شاحمات وليمپياداسىندا جەكەلەي سىندا التىن مەدال جەڭىپ الدى.
بۇل تۋرالى مادەنيەت جانە سپورت مينيسترلىگى مالىمدەدى، دەپ حابارلايدى قازاقپارات.
«سوڭعى اينالىمعا دەيىن ءبىز مەدالدار ءۇشىن وتە ءساتتى كۇرەستىك. ەڭ باستىسى، جىگىتتەر وتە جوعارى دايىندىق پەن جاقسى ويىن كورسەتتى. قولا جۇلدەنى يمانعالي احيلباي (تاقتادا - جەكە ەسەپتە)، التىندى ساۋات نۇرعالييەۆ (تاقتادا - جەكە ەسەپتە) يەلەندى. بىزبەن 12 جانە 14 جاستاعى جىگىتتەر وينادى، كەلەسى جىلى ءبىز تاعى دا وسى قۇراممەن مەدالدار ءۇشىن كۇرەسۋدى جوسپارلاپ وتىرمىز»، - دەيدى كوماندا كاپيتانى پاۆەل كوتسۋر.