اقتوبە وبلىسىندا ءبىر عاسىرلىق ديىرمەن قورعاۋعا الىنادى

استانا. قازاقپارات- اقتوبە وبلىسىندا ءبىر عاسىر بۇرىن سالىنعان جەل ديىرمەنىن جوندەيتىن ۋاقىت بولدى. مەملەكەت قورعاۋىنا الىنعان نىسان ءبىراز جىل بويى كۇتىمسىز قالعان. سوڭعى رەت قاشان جوندەۋ جۇرگىزىلگەنىن ەشكىم بىلمەيدى.

ديىرمەن 1909 -جىلدان باستاپ، وتكەن عاسىردىڭ ورتا شەنىنە دەيىن جۇمىس ىستەگەن. كەيبىر دەرەكتەردە قازاق ەلىنە قونىس اۋدارعان ۋكراين كوپەستەرىنىڭ تۇرعىزعانى جازىلعان. ديىرمەن تىڭ يگەرۋ ناۋقانى كەزىندە ۇزدىكسىز جۇمىس جاساپتى. ديىرمەن تاريحىن سول ماڭداعى ەسەت باتىر اۋىلىنىڭ بايىرعى تۇرعىندارى جاقسى بىلەدى. ءبىراق، توقتاعان سوڭ ۇزاق جىل قاراۋسىز قالعان. بيىل عانا العا اۋدانىنىڭ بيۋدجەتىنەن 3 ميلليون تەڭگەدەن استام قارجى ءبولىنىپ، اينالاسى اباتتاندىرىلدى. ەندى تاياۋ كۇندەرى جارىق شامدارى ورناتىلماق. تاريحي نىساندى قايتا قالپىنا كەلتىرۋ ءۇشىن ماماندار وبلىس اكىمدىگى جانىنداعى ءتيىستى كوميسسياعا ۇسىنىس تۇسىرمەك ويدا. ءسويتىپ، سالىنعانىنا 113 جىل بولعان جەل ديىرمەنىن ساقتاپ قالۋدى جوسپارلاپ وتىر.

www.24.kz