تۇركىستاندىق سۋرەتشى بالاعا حالىقتىڭ كومەگى قاجەت
تۇركىستان وبلىسى تولەبي اۋدانىندا ابدىراحمەن تەمىربەك ەسىمدى سۋرەتشى بالا تۇرادى. نەبارى 15 جاسىندا تالانتىمەن تانىلعان ول سالعان سۋرەتتەرىن ساتىپ، ازىن- اۋلاق بولسا دا اقشا تاۋىپ وتىر. مۇنداي قادامعا بوزبالا قىزىعۋشىلىقتان ەمەس، قاجەتتىلىكتەن باردى. سەبەبى، جاس تالانت يەسىنىڭ ەم- دومىنا قوماقتى قاراجات قاجەت.
«2009 -جىل بولاتىن. ورال قالاسىندا تۇراتىن ەدىك. سوندا جۇمىس ىستەپ، باقىتتى وتباسىلىق عۇمىردى باستان وتكەرىپ جۇردىك. ءبىر كۇنى ءۇيىمىز ورتەنىپ، ىشىندە ۇلىم ءابدىراحمان مەن جۇبايىم اينۇر قالىپ قويدى. ەكەۋىن دە قاتتى كۇيىك شالدى. العاشقى قاجەتتى وپەراتسيالار جاسالدى، ءبىراق ءابدىراحماننىڭ بەتىن ساقتاپ قالۋ مۇمكىن بولمادى. سودان بەرى ەمدەتۋ ءۇشىن بارماعان جەرىمىز جوق»- دەيدى اكەسى بەرىك.
ءابدىراحمان كۇيىك شالعان ۋاقىتتا 2,5 جاستا بولعان. قولىن، بەتىن، باسىن تۇگەلىمەن كۇيىك شالعان. ءتىپتى، ون كۇن بويى كومادا جاتقان ونىڭ الاقانى اشىلماي، قولى جازىلماي قالعان. بەت- ءجۇزى تۇگەل كۇيىپ، شاشتارى جانىپ كەتكەن. ال ايەلى اينۇردىڭ يىقتارى جابىسىپ قالعان. قولدارى دا قاتتى كۇيگەن.
«العاشقىدا وتە قيىن جاعدايدى باستان كەشىردىك. كەيىن جايمەن رەتتەلە باستادى. ايەلىم مەن ۇلىما شىمكەنتتەگى تۇرىك دارىگەرى كوپ كومەكتەستى. قولدارى مەن يىقتارىن اشىپ بەردى. ال ءابدىراحماننىڭ بەت- الپەتىن ورنىنا كەلتىرۋ بويىنشا دارىگەر تاپپادىق. كورەياعا دەيىن الىپ باردىق. ول جاقتا ءبىزدى قابىلدامادى. ەمدەي الاتىن دارىگەردى تەك يزرايلدەن تاپتىق» - دەيدى بەرىك.
قازىرگى كەزدە ءابدىراحمان يزرايلدە ەكى رەت وتا جاساتقان. ەندى ون كۇننەن سوڭ ءۇشىنشى وتاعا بارۋى كەرەك. ول ءۇشىن 24542318 تەڭگە قاراجات قاجەت. قازىرگى كەزدە وتباسى بالالارىنىڭ ەم- دومى ءۇشىن حالىقتان كومەك سۇراپ، قارجى جيناۋدا. سەبەبى، اكەسى جۇمىسسىز. اۋىلداعى تابىلعان ءىستى اتقارىپ، كۇنكورىس ەتەدى. اناسى اينۇر دا بالا تاربيەسىمەن ۇيدە وتىر. كوپبالالى وتباسى ءۇشىن قوماقتى قاراجاتتى جيناۋ وڭايعا سوقپاي تۇر.
«باقىتىمىزعا وراي، يزرايلدىك كلينيكانىڭ دارىگەرلەرى ۇلىما جاڭا بەت- الپەت جاساپ بەرە الاتىنىن ايتتى، ءبىراق بۇل، ارينە، ۇلكەن اقشانى قاجەت ەتەدى. ءۇيدى ساتتىق، قارىز الدىق. مۇنىڭ ءوزى جەتكىلىكسىز. وتا 4 كەزەڭنەن تۇراتىندىقتان تولەمدەر جىل بويى جالعاسىپ جاتىر. وتكەن جىلى جاساتقان وتامىزعا وسكەمەندەگى «كازتسينك» مەكەمەسى قولداۋ ءبىلدىردى. ال بۇل جولى بلوگەرلەردىڭ كومەگىمەن قاراجات جيناپ جاتىرمىز. قازىرگى كەزدە 5 ميلليون تەڭگەگە جۋىق اقشا جەتپەي تۇر. مۇنىڭ ءوزى ءۇشىنشى كەزەڭنىڭ وتاسى ءۇشىن. ەم- دوم بارىسىندا ءبىرقاتار پروتسەدۋرالار ۋاقىتىلى جاسالۋى كەرەك، ايتپەسە الدىڭعىلارى پايداسىز بولادى»، - دەيدى ول.
بەرىك پەن اينۇر 7 ۇل، 1 قىز تاربيەلەپ وتىرعان كوپبالالى وتباسىلاردىڭ ءبىرى. ۇلكەن ۇلى يسمايل 22 جاستا. كوللەدجدى بىتىرگەن ول تۇراقتى كاسىبى بولماعاندىقتان، اۋىل اراسىنداعى قۇرىلىس جۇمىستارىن ىستەيدى. ال اقەركە - تۇرمىستا، ءابدىراحمان، تالحا، ءابدۋلازيز، ءابدىراحيم، وسمان - مەكتەپ وقۋشىلارى. ەڭ كىشكەنتاي مۇسانىڭ دۇنيەگە كەلگەنىنە 8 اي بولدى.
«ۇلىم ءۇشىن ورالدان بىركولىككە كوشىپ كەلدىك. سەبەبى، بالام كوپشىلىك ورتادا بەت- الپەتىن كورسەتىپ جۇرۋگە ۇيالدى. اۋىلداعى مەكتەپتە بالا سانى از. مۇندا ەركىن جۇرە الادى، بالالارمەن بىرگە وينايدى. سوندىقتان كوڭىلىن قيمادىم. جۇبايىمدى دا قاتتى كۇيىك شالعان. ونى ەمدەتۋگە شامامىز جەتپەدى. بار كۇشىمىزدى بالامىزعا جۇمساپ جاتىرمىز»، - دەيدى اكەسى.
ءابدىراحمان وزات وقۋشى. بوس ۋاقىتىندا شىعارماشىلىقپەن اينالىسىپ، سۋرەت سالعاندى ۇناتادى. تابيعاتتاعى كورىنىستەردى اينىتپاي بەينەلەيدى. تالانتتى جاستىڭ قولىنان شىققان تۋىندىلارعا قىزىققان كوپشىلىك كوپتەگەن سۋرەتتەرىن ساتىپ العان. ءتىپتى، Instagram ارقىلى شەتەلدىكتەر دە تاپسىرىس بەرەدى. تاپقان تابىسىن ەم- دومى ءۇشىن اكەسىنە تابىستايدى. باستى ماقساتى - بەتىن، ءتۇر- الپەتىن قايتارۋ. ول الەمدى «سەنىم، ءۇمىت جانە ماحاببات قۇتقارادى» دەپ سەنەدى. دەگەنمەن، بوزبالانىڭ كوزىندەگى مۇڭ كەز كەلگەن ادامعا بىردەن كورىنەدى.
«قازىرگى كەزدە ءابدىراحماننىڭ يزرايلگە باراتىن ۋاقىتى تاياپ قالدى. 18+قازان كۇنگە دەيىن مەجەلى سوما جيناقتالۋى ءتيىس. قۇرمەتتى كوپشىلىك! ءبىز سىزدەردەن كومەك كۇتەمىز. بالامىز ءابدىراحمان ءۇشىن ەڭ بولماعاندا بەرگەن قولداۋلارىڭىز، ءبىز ءۇشىن ۇلكەن كومەك» - دەيدى اكەسى بەرىك.
قانداي دا ءبىر كومەك كورسەتۋگە نيەتتى قازاقستاندىقتار كەلەسى نومەرلەرگە حابارلاسا الادى: 77471153107؛ 77712130707