ورتالىق سايلاۋ كوميسسياسىندا كەزەكتەن تىس پرەزيدەنت سايلاۋىنا ۇمىتكەرلەردىڭ مەملەكەتتىك ءتىلدى ءبىلۋ دەڭگەيىن انىقتايتىن لينگۆيستيكا كوميسسياسىنىڭ العاشقى وتىرىسى ءوتىپ جاتىر. سىناق تاپسىرۋشى كانديدات - مەيرام قاجىكەن.
لينگۆيستيكا كوميسسياسىنىڭ ءتوراعاسى ءادىل احمەتوۆ ۇمىتكەرلەردى قانداي تاپسىرما، سۇراقتار كۇتىپ تۇرعانىن ايتتى.
«ورتالىق سايلاۋ كوميسسياسىنىڭ شەشىمىمەن قۇرىلعان لينگۆيستيكا كوميسسياسى بۇگىن جۇمىسىن باستاپ كەتتى. ونىڭ قۇرامىنا كىرگەن التى عالىم تۋرالى ب ا ق- تا جاريالانعانىن بىلەسىزدەر.
ءبىرىنشى بولىپ پرەزيدەنتىككە ۇمىتكەر مەيرام زەكەش ۇلى قاجىكەن بۇگىن ەمتيحان تاپسىرىپ جاتىر. ول ازامات - «امانات» كاسىپوداقتار دوستاستىعى اتىنان ۇسىنىلعان تۇلعا. قازىر ءبىرىنشى سۇراعىن ءبىتىرىپ، جازبا جۇمىسىن اياقتادى.
ەندى ەكىنشى سۇراققا جاۋاپ بەرىپ جاتىر - ەركىن تاقىرىپتا بەرىلگەن ءماتىندى مانەرلەپ وقۋ.
ۇشىنشىسىندە بەلگىلى تاقىرىپقا ءسوز سويلەيدى.
ەمتيحان ءالى اياقتالعان جوق. كوميسسيا مۇشەلەرى قازىر تىڭداپ وتىر. ەمتيحان بارىسىندا ۇمىتكەر بۇكىل جۇمىسىن تاسىرعاننان كەيىن كوميسسيا مۇشەلەرى ءاربىر سۇراققا قالاي جاۋاپ بەردى، قالاي جازدى، مانەرلەپ وقۋ قالاي بولدى، جازۋ جۇمىسىنىڭ مازمۇنى قالاي، مەملەكەتتىك ءتىلدى ەركىن مەڭگەرگەن بە، الدە مەڭگەرمەگەن بە، وسىلاردىڭ ءبارىن انىقتاعاننان كەيىن شەشىم شىعارادى. ول شەشىم شىققان بويدا ۇمىتكەرگە سول جەردە ايتىلادى. ياعني، ۇمىتكەر مەملەكەتتىك ءتىلدى قاجەتتى دەڭگەيدە مەڭگەردى مە، جوق پا دەگەن سۇراققا جاۋابىن الىپ كەتەدى.
ارينە، بۇگىن ءبىرىنشى كۇن. ەرتەڭ دە، تۇستەن كەيىن دە جۇمىس جالعاسا بەرەدى. مەنىڭشە، ازىرگە اقپارات قۇرالدارىنا جاريالايتىن حابار وسى عانا»، - دەدى فيليلوگيا عىلىمدارىنىڭ دوكتورى.
ەسكە سالساق، كەشە ق ر ورتالىق سايلاۋ كوميسسياسىندا ق ر پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرۋىن بەلگىلەۋ جونىندەگى لينگۆيستيكا كوميسسياسىنىڭ ءبىرىنشى ۇيىمداستىرۋ وتىرىسى وتكەن بولاتىن. ونىڭ قۇرامىنا فيلولوگيا، ءتىل ءبىلىمى مەن ادەبيەت سالاسىنداعى كورنەكتى عالىمدار: احمەتوۆ ءادىل قۇرمانجان ۇلى، ەسىم گاريفوللا، دادەبايەۆ جانقارا دادەباي ۇلى، قۇرمانباي گۇلتاس سايىن قىزى، قامزابەك ۇلى ديحان، فازىلجانوۆا انار مۇرات قىزى ەندى.
سونداي- اق كەشە كەزەكتەن تىس پرەزيدەنت سايلاۋىنا ۇمىتكەر رەتىندە ايەل- كانديدات ۇسىنىلعان بولاتىن.
وزگە كانديداتتار تۋرالى مالىمەتتى مىنا سىلتەمدەن وقۋعا بولادى.