جاسىرىن داۋىسپەن «اق جول» پارتياسى پرەزيدەنت سايلاۋىنا ۇمىتكەردى تاڭدادى

استانا. قازاقپارات - «اق جول» دەموكراتيالىق پارتياسى پرەزيدەنت سايلاۋىنا مەملەكەت باسشىسى قاسىم- جومارت توقايەۆتىڭ كانديداتۋراسىن قولدادى، دەپ حابارلايدى قازاقپارات ءتىلشىسى.

پارتيانىڭ كەزەكتەن تىس ⅩⅨ سەزىندە پرەزيدەنت سايلاۋىنا قاتىسۋعا جەتىسۋلىق جۋرناليست ساندۋعاش دۇيسەنوۆا، ءماجىلىس دەپۋتاتى سەرىك ەرۋبايەۆ جانە «اق جول» ق د پ اقتوبە وبلىستىق فيليالىنىڭ ءتوراعاسى، كاسىپكەر اسقار سادىقوۆ نيەت بىلدىرگەن ەدى.

سونىمەن بىرگە پارتيا مۇشەلەرى قازىرگى پرەزيدەنت قاسىم- جومارت توقايەۆتىڭ دا كانديداتۋراسىن قولداۋدى ۇسىنعان.

جاسىرىن داۋىس بەرۋ ءۇشىن 126 بيۋللەتەن قولدانىلدى. ءبىرىنشى ۇمىتكەر جۋرناليست ساندۋعاش دۇيسەنوۆا 11 داۋىس جيناپ، 6 پايىزدى يەلەنسە، دەپۋتات سەرىك ەرۋبايەۆ 23 داۋىسپەن 19 پايىزعا يە بولدى.

ال پارتيانىڭ اقتوبە وبلىستىق فيليالىنىڭ ءتوراعاسى اسقار سادىقوۆ 17 داۋىسپەن 13,7 پايىز السا، مەملەكەت باسشىسى قاسىم- جومارت توقايەۆتىڭ كانديداترۋاسىن 74 ادام - قاتىسۋشىلاردىڭ 64,1 پايىزى قولداعان.

«اق جول» دەموكراتيالىق پارتياسىنىڭ ءتوراعاسى ازات پەرۋاشيەۆتىڭ ايتۋىنشا پرەزيدەنت قاسىم- جومارت توقايەۆ كەزەكتەن تىس سايلاۋ جاريالاعالى پارتيا اتىنان 6 ادام سايلاۋعا تۇسۋگە نيەت بىلدىرگەن.

«بۇل بويىنشا ورتاق كەلىسىمگە كەلگەن جوقپىز. شەشىمدى قابىلداۋعا تەك سەزدىڭ ءوزى قۇزىرەتى بار. بۇل ماسەلەنى سىزدەردىڭ قاراۋلارىڭىزعا شىعارايىق دەپ شەشتىك. ءبىر پارتيا بولعاندىقتان، ارامىزدا ءتۇرلى پىكىر بولسا دا، پارتيامىز اتىنان، قۇرىلتاي قابىلداعان شەشىمدى قابىلداپ، ءبارىمىز بۇل ۇمىتكەرگە قىزمەت ەتۋگە ءتيىسپىز دەپ بىلەمىن. سونى ساقتاۋعا سىزدەردى شاقىرامىن. بۇل 6 ادامنىڭ ءبىرى - ءىرى بيزنەسمەن، ءبىزدىڭ پارتيا اتىنان قاتىسقىسى كەلدى، ءبىراق پلەنۋم ونى قولدامادى. تاعى ءبىر كىسى باسىندا قاتىسامىن دەپ، كەيىننەن قاتىسپاۋدى ۇيعاردى. تاعى ءبىر ادام ءوزى ۇلتتىق كەڭەستە ۇسىنىس جاسالدى، ءبىراق سوڭىندا باس تارتتى. اياعىندا ءۇش ۇزەڭگىلەسىمىز پارتيا اتىنان سايلاۋعا قاتىسۋعا نيەتتى. ودان بولەك، ۇلتتىق كەڭەستە كەي ارىپتەستەرىمىز پرەزيدەنتتىڭ پاۆلوداردا ايتقان ءسوزىن، ونىڭ قوعامدىق قوزعالىستار اتىنان تۇسەتىنىن ەستىپ، پرەزيدەنتتى قولداۋدى دا ۇسىندى. مۇنداي پىكىرمەن دە ساناسۋىمىز كەرەك»، - دەدى ازات پەرۋاشيەۆ.

ەسكە سالا كەتسەك، 2019 -جىلى 9 - ماۋسىمدا ەلدەگى پرەزيدەنت سايلاۋىنا «اق جول» دەموكراتيالىق پارتياسى اتىنان ءدانيا ەسپايەۆا قاتىسقان ەدى. قازاقستان سايلاۋ تاريحىنداعى العاشقى ايەل- كانديدات سايلاۋشىلار داۋسىنىڭ % 5,05 جينادى.

اۆتور

ايجان سەرىكجان قىزى