اپتا سوڭىنا قاراي ەلدىڭ سولتۇستىگىندە قار جاۋادى - سينوپتيكتەر

استانا. قازاقپارات - سينوپتيكتەر الداعى ءۇش كۇندە قازاقستانداعى اۋا رايىنا قاتىستى بولجامىن جاريالادى، دەپ حابارلايدى قازاقپارات.

اپتانىڭ ەكىنشى جارتىسىندا ەل اۋماعىنىڭ باسىم بولىگى ءالى دە كەڭ اۋقىمدى انتيتسيكلون ىقپالىندا بولادى. رەسپۋبليكانىڭ سولتۇستىك، ورتالىق وبلىستارىندا جىلى، جاۋىن-شاشىنسىز كۇن رايى ساقتالادى، انتيتسيكلوننىڭ ىعىسۋىمەن ەل شىعىسىندا جاۋىن-شاشىن توقتايدى.

ءوز كەزەگىندە، سكانديناۆيا تۇبەگىنەن اسەر ەتەتىن تسيكلوننىڭ باتىستان شىعىسقا اۋىسۋىنان الدىمەن باتىس، سولتۇستىك-باتىس، ال اپتانىڭ سوڭىنا قاراي ەلدىڭ سولتۇستىك جانە ورتالىق وبلىستارىندا نايزاعاي ويناپ، جاڭبىر جاۋادى.

سولتۇستىكتە تۇندە جاۋعان جاڭبىر قارعا ۇلاسۋى مۇمكىن. سونداي-اق جەل كۇشەيىپ، كۇندىز باتىس وبلىستاردا بۇرشاق جاۋۋى ىقتيمال. رەسپۋبليكانىڭ وڭتۇستىگىندە فرونتالدى اعىننىڭ وتۋىمەن كۇن كۇركىرەپ، تاۋلى ايماقتاردا جاڭبىر جاۋىپ، قارعا اۋىسادى. رەسپۋبليكانىڭ بارلىق اۋماعىندا تۇندە تۇمان تۇسەدى.

كۇندىز ەل باتىسىندا 15-23 گرادۋس، ال ورتالىقتا 15-25 گرادۋس جىلى بولادى. سولتۇستىك جارتىسىندا كەي جەرلەردە تەرمومەتر باعانالارى 10-18 گرادۋس جىلىلىقتى كورسەتەدى. شىعىستا اۋانىڭ تەمپەراتۋراسى 8-17 گرادۋستان 14-23 گرادۋسقا دەيىن، وڭتۇستىك-شىعىستا 15-23 گرادۋسقا دەيىن، تاۋلى ايماقتاردا 8-13 گرادۋستان 20-25 كە دەيىن جوعارىلايدى، رەسپۋبليكانىڭ وڭتۇستىگىندە نەگىزگى تەمپەراتۋرالىق فون 20-28 گرادۋسقا دەيىن كوتەرىلەدى. تاۋلى ايماقتاردا 10-15 گرادۋس جىلى بولادى.