بەلگيادا اتوم ەلەكتر ستانسياسىنىڭ ءبىر رەاكتورى وزدىگىنەن ىستەن شىعىپ قالدى

بريۋسسەل. قازاقپارات - بەلگيانىڭ لەج پروۆينتسياسىنداعى «تيانج-3» اتوم رەاكتورى جوسپاردان تىس ءوشىپ قالدى. بيلىك ەلدەگى ەلەكتر قۋاتىنا تونگەن قاۋىپ جوق ەكەنىن اتاپ ءوتتى، دەپ حابارلايدى قازاقپارات ءتىلشىسى.

تيانج-3 يادرولىق رەاكتورى قازىر جۇمىس ىستەمەيدى. اتوم ەلەكتر ستانسياسىن باسقاراتىن Engie ەنەرگەتيكالىق كومپانياسى رەاكتور جۇمىسى دۇيسەنبى كۇنى تاڭعى 8:30 شاماسىندا توقتاپ قالعانىن حابارلادى.

وپەراتور مالىمدەمەسىندە بۇگىن تاڭەرتەڭ قىزمەتكەرلەر رەاكتوردى قاۋىپسىز كۇيگە كەلتىرگەنى ايتىلعان. قازىرگى ۋاقىتتا «Engie Electrabel» رەاكتوردىڭ توقتاپ قالۋ سەبەبىن انىقتاپ جاتىر.

بەلگيادا جۇمىس ىستەپ تۇرعان قالعان 5 يادرولىق رەاكتور قالىپتى جۇمىس ىستەپ تۇر جانە ەلەكتر جەلىسى وپەراتورى تيانج-3 رەاكتورىنداعى اقاۋلار ەلەكتر قۋاتىنا اسەر ەتپەيتىنىن ايتادى.

اۆتور

سماعۇلوۆا ەركەجان