پاتەراقىنىڭ قىمباتتاۋى ۋاقىتشا قۇبىلىس - ءلاززات يبراگيموۆا

مۇنداي پىكىردى ول ورتالىق كوممۋنيكاتسيالار قىزمەتىندە وتكەن بريفينگىدە ايتتى.

ب ا ق وكىلى ەل بويىنشا پاتەراقىنىڭ قىمباتتاپ جاتقانىن ەسكە سالىپ، تۇرعىن ءۇي جالداۋ سۋبسيدياسىنىڭ مولشەرىن قايتا قاراۋ كەرەك شىعار دەگەن سۇراق قويدى.

«تاريفتەر ق ر يندۋستريا جانە ينفراقۇرىلىمدىق دامۋ ءمينيسترىنىڭ بۇيرىعىمەن بەكىتىلەدى. ولار ءار ايماقتا ءار ءتۇرلى. ارنايى كەستە بار. مەنىڭ ويىمشا، ءبىز باستان وتكەرىپ جاتقان پاتەراقىنىڭ ءوسۋ قۇبىلىسىن كەم دەگەندە ءبىر جارىم اي بويى باقىلاۋ كەرەك. بۇل ۋاقىتشا قۇبىلىس دەپ ويلايمىن. كەيىن ءبارى بۇرىنعى دەڭگەيگە ورالادى»، - دەدى لياززات يبراگيموۆا.

سونداي-اق ول باسپانا جالعا بەرۋشىلەردىڭ سۋبسيديا الاتىن ساناتپەن باسپانا جالداۋ شارتىن رەسمي جاساسۋدان باس تارتۋى ءجيى كەزدەسەتىنىن ايتتى. سونىڭ سالدارىنان سۋبسيديا الۋعا قۇقىق ازاماتتاردىڭ كوبى بۇل مۇمكىندىكتى پايدالانۋعا قۇلىقسىز كورىنەدى.

«ءبىز ءوز پلاتفورمامىزدا تۇرعىن ءۇي جالداۋ سۋبسيدياسىن الۋعا قۇقىعى بار ءتورت ساناتتى بەلگىلەدىك. ولار ءبىرىنشى جانە ەكىنشى توپتاعى مۇگەدەكتەر، جەتىم بالالار، كوپ بالالى وتباسىلار جانە مۇگەدەكتىگى بار بالالاردى تاربيەلەپ وتىرعان وتباسىلار. ولاردىڭ سانى وتە كوپ. 61 مىڭ جەتىم بالا، 21,4 مىڭ مۇگەدەك بالا تاربيەلەپ وتىرعان وتباسى، 51 مىڭ مۇگەدەكتىگى بار ەرەسەك ادام، 91 مىڭ كوپبالالى وتباسى بار. ءبىراق تەك 25 مىڭعا جۋىق ءوتىنىش ءتۇستى. ونىڭ 8 مىڭعا جۋىعىن ماقۇلدادىق»، - دەدى بانك باسشىسى.