بۇل تۋرالى باس پروكۋروردىڭ ورىنباسارى اسەت شىنداليەۆ ايتتى، دەپ حابارلايدى قازاقپارات ءتىلشىسى.
«قازىر ءىستى (كارىم ماسىموۆكە قاتىستى) ارنايى پروكۋرورلار تەرگەپ جاتقان جوق. ءىس ۇلتتىق قاۋىپسىزدىك كوميتەتىندە جانە ول قۇپيالىلىق گريفى بويىنشا جۇرگىزىلىپ جاتىر. سوندىقتان ءىس ماتەريالدارى جاريالانۋعا جاتپايدى. وسى ءىستى تەرگەۋ امالدارىنا قاتىسقان بەلگىلى ءبىر پروكۋرورلار توبى بار. اتاپ ايتقاندا، تەرگەلىپ جاتقان ادامداردىڭ ءبارى قاماۋدا وتىر، ەشكىم ەشقايدا كەتكەن جوق»، - دەدى اسەت شىنداليەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.
بۇل تۇرعىدا ول قازىر ءىستى تەرگەۋ اياقتالعانىن، وسى ورايدا ءىس-ماتەريالدارىمەن تانىسۋ ءجۇرىپ جاتقانىن ايتتى.
ءا. شىنداليەۆتىڭ ايتۋىنشا، ءتارتىپ بويىنشا كۇدىكتىلەر ىسپەن تانىسادى. تانىسقان سوڭ، ارىزدارىن بەرەدى. تەرگەۋشى ول ارىزداردى قاراپ، كەيىن پروكۋرورعا جىبەرەدى.
بۇدان بۇرىن حابارلانعانداي، ۇ ق ك بۇرىنعى باسشىلىعى ك. ق. ماسىموۆكە، ا. ت. سادىقۇلوۆقا، د. ە. ەرعوجينگە، م. س. وسىپوۆكە جانە لاۋازىمدى ادامدار د. م. اكيپوۆكە، ن. ك. بەكمۇراتقا، ا. ا. قاتىستى قىلمىستىق ءىستى تەرگەۋدى اياقتادى.
قازىر كۇدىكتىلەردى ءىس ماتەريالدارىمەن تانىستىرۋ جۇرگىزىلىپ جاتىر. ءىس ماتەريالدارىمەن تانىسۋ كەزەڭىندە قاماۋدا ۇستاۋ مەرزىمى ءماسىموۆ پەن سادىقۇلوۆقا 6-قازانعا، ەرعوجينگە 13-قازانعا جانە وسىپوۆكە 22-قازانعا دەيىن ۇزارتىلدى.