پاۆلودار وبلىسىندا رەسەيدەن كەلگەندەر ءۇشىن جەدەل جەلى ىسكە قوسىلادى

پاۆلودار. قازاقپارات - پاۆلودار وبلىسىنىڭ اكىمى كوشى- قون ماسەلەلەرى بويىنشا وڭىرلىك جەدەل شتابتىڭ وتىرىسىن وتكىزدى، دەپ حابارلايدى قازاقپارات.

رەسەي فەدەراتسياسىنان كەلۋشىلەر سانىنىڭ ارتۋى وڭىرلىك جەدەل شتابىنىڭ وتىرىسى بارىسىندا قاراستىرىلدى.

ءابىلقايىر سقاقوۆ ميگراتسيالىق پروتسەسستەردى باقىلاۋدى كۇشەيتۋدى تاپسىردى.

ق ر ۇ ق ك شەكارا قىزمەتى دەپارتامەنتىنىڭ باستىعى عاني بەكمىرزايەۆتىڭ اقپاراتىنا قاراعاندا، 21-26-قىركۇيەك ارالىعىندا پاۆلودار وبلىسى شەكارا بەكەتتەرىنەن 35 مىڭ ادام وتكەن.

ونىڭ ىشىندە 13 مىڭ ادام - رەسەي فەدەراتسياسىنىڭ ازاماتتارى، 5 مىڭى قازاقستان اۋماعىنان كەتتى.

پوليتسيا دەپارتامەنتىنىڭ باستىعى ۆاسيليي سكلياردىڭ سوزىنە قاراعاندا، سوڭعى بەس كۇن ىشىندە حقو جانە كوشى-قون قىزمەتى بولىمشەلەرىنە كەلۋى تۋرالى ەسكەرتۋ بويىنشا 388 رەسەيلىك ازامات ءوتىنىش بەرگەن، ۋاقىتشا تۇرۋعا 154 ادام كومەككە جۇگىنگەن.

وبلىستاعى كريمينوگەندىك جاعداي تۇراقتى.

وبلىس ورتالىعىندا ءۇش حالىققا قىزمەت كورسەتۋ ورتالىعى ۇزدىكسىز جۇمىس ىستەپ تۇر. پاۆلوۆ، 48-مەكەنجايى بويىنشا كۇشەيتىلگەن ح ق و اشىلدى.

ادامداردىڭ شامادان تىس كوپ شوعىرلانباس ءۇشىن شەتەلدەن كەلۋشىلەر ءۇشىن ارنايى كەزەك پەن بەس قوسىمشا تەرەزە ۇيىمداستىرىلعان.

ءابىلقايىر سقاقوۆ جاعدايدى مونيتورينگ جۇرگىزۋ مەن ءتۇسىندىرۋ جۇمىستارىن تۇراقتى تۇردە وتكىزىپ، بارلىق مەملەكەتتىك ورگانداردىڭ بىرلەسكەن ءىس- قيمىلىن كۇشەيتۋدى تاپسىردى.

«جىلجىمايتىن مۇلىك نارىعىنداعى جاعدايدى تۇراقتاندىرۋ بويىنشا ءىس-شارا قولدانۋ ماڭىزدى. پوليتسيا دەپارتامەنتى مەن پاۆلودار وبلىسى بويىنشا مەملەكەتتىك كىرىس دەپارتامەنتىنە وڭىردەگى زاڭدىلىق پەن قاۋىپسىزدىكتى قامتاماسىز ەتىپ، كەلگەن رەسەيلىكتەردى ۋاقتىلى تىركەۋ بويىنشا الگوريتم ازىرلەۋ قاجەت، - دەدى ءوڭىر باسشىسى. - قالالار مەن اۋداندار اكىمدەرى ميگرانتتار لەگىن رەتتەۋگە ارنالعان شتابتار قۇرۋ كەرەك».

وبلىس اكىمى شەتەلدەن كەلگەندەرگە ق ر زاڭعا سايكەس كومەك كورسەتىلەتىنىن اتاپ ءوتتى.

قۇزىرەتتى ورگاندارعا قوناق ءۇي يەلەرى جانە ميگرانتتارمەن جاۋاپكەرشىلىك جايىندا ءتۇسىندىرۋ جۇمىسىن جۇرگىزۋ تاپسىرىلدى.

وبلىستا جەدەل جەلى ىسكە قوسىلادى.