قاسىم-جومارت توقايەۆ قالادا كولىك-لوگيستيكا جانە ينجەنەرلىك ينفراقۇرىلىمدى جەتىلدىرۋ قاجەت ەكەنىن ايتتى.
«قالانىڭ اينالما جولىن تۇيىقتايتىن اۆتوجولدى تەزىرەك ىسكە قوسۋدى جانە جاڭا اۋەجاي تەرمينالىنىڭ قۇرىلىسىن ۋاقتىلى اياقتاۋدى تاپسىرامىن.
سوڭعى كەزدە شاھارعا ىرگەلەس جاتقان 41 ەلدى مەكەن قوسىلدى، سول سەبەپتى ينجەنەرلىك ينفراقۇرىلىمنىڭ قۋاتىن ارتتىرۋ قاجەتتىگى تۋىندادى. وسى ماقساتقا 4 جىلدا رەسپۋبليكا بيۋجەتىنەن 135 ميلليارد تەڭگەگە جۋىق قارجى ءبولىندى. سونىڭ ناتيجەسىندە اۋىز سۋ، ەلەكتر قۋاتى جانە گاز ماسەلەسى ءبىرشاما رەتتەلدى. جىلدىڭ سوڭىنا دەيىن 15 مىڭ تۇرعىنى بار قۇرساي اۋماعىنا اۋىز سۋ جەتكىزىلەدى. كەلەسى جىلى قالا ورتالىعىنان شالعاي ورنالاسقان 2 ەلدى مەكەننىڭ سۋ ماسەلەسىن تولىق شەشۋدى تاپسىرامىن»، - دەدى ق. توقايەۆ.
سونداي-اق پرەزيدەنتتىڭ ايتۋىنشا، وڭىردەگى تاعى 8 ەلدى مەكەندە گاز مۇلدەم جوق.
«قازىر 8 ەلدى مەكەندە ساپالى ەلەكتر جۇيەسى جوق. الداعى جىلى بۇل ماسەلەنى تولىعىمەن شەشۋ قاجەت. سونداي-اق تاعى 8 ەلدى مەكەندە گاز مۇلدە جوق. ۇكىمەت پەن اكىمدىككە بۇل جەرلەرگە گاز جەتكىزۋ ءۇشىن قارجى ءبولۋ ماسەلەسىن پىسىقتاۋدى تاپسىرامىن»، - دەدى مەملەكەت باسشىسى.
ايتا كەتسەك، پرەزيدەنت شىمكەنت قالاسىنا جۇمىس ساپارىمەن كەلگەن بولاتىن. ق. توقايەۆ شاھاردى دامىتۋعا 170 ميلليارد تەڭگە قارجى بولىنگەنىن ايتتى.