مەكتەپتە وقۋشىلاردىڭ ۇيالى تەلەفون قولدانۋىنا تىيىم سالۋعا بولا ما - مينيستر جاۋابى

استانا. قازاقپارات - مەكتەپتە وقۋشىلاردىڭ ۇيالى تەلەفوندى قولدانۋ نەمەسە وعان تىيىم سالۋ شەشىمىن ءبىلىم ورداسىنىڭ قامقورشىلىق كەڭەسى شەشەدى.

ورتالىق كوممۋنيكاتسيالار قىزمەتىندە وتكەن بريفينگىدە وقۋشىلاردىڭ ساباق كەزىندە گادجەتتەردى ۇستاۋىنا قاتىستى جاۋاپ بەرگەن وقۋ-اعارتۋ ءمينيسترى اسحات ايماعامبەتوۆ وسىلاي مالىمدەدى، دەپ حابارلايدى قازاقپارات ءتىلشىسى.

«وزدەرىڭىز بىلەتىندەي، بىزدە تىيىم سالۋ دەگەن وڭاي. ءبىراق تىيىممەن بارلىق ماسەلە شەشىلمەيدى. ول مۇعالىم بولعاننان كەيىن بالالارمەن ءتيىستى جۇمىس جۇرگىزۋى كەرەك. سونىمەن قاتار، ءبىز بارلىق مەكتەپتەرگە ارنايى قۇزىرەت بەردىك. ول قانداي قۇزىرەت؟ ءار مەكتەپ ءوزىنىڭ ىشكى ەرەجەلەرىن وزدەرى قابىلدايدى. سونىڭ ىشىندە تەلەفون قولدانۋ ءتارتىبىن دە بەكىتۋگە بولادى. كەيبىر مەكتەپتەردە ساباق باستالعان ۋاقىتتا بالالار تەلەفوندارىن ءتيىستى جەرگە قويىپ قويادى. ال ەندى كەيبىر مەكتەپتەردە كىرەبەرىستە ارنايى جاشىككە قالدىرىپ كەتەدى تەلەفوندارىن. ول ءبىرىنشى كەزەكتە مەكتەپتىڭ قومقورشىلىق كەڭەسى مەن پەداگوگيكالىق كەڭەسىنىڭ قۇزىرەتىندە»، - دەپ ءتۇسىندىردى اسحات ايماعامبەتوۆ.

بريفينگى اياسىندا مينيستر شەتەلدىك پەداگوگتەردى جۇمىسقا قابىلداۋ ءتارتىبىن دە ءتۇسىندىردى. ايتۋىنشا، پەداگوگتەردى جۇمىسقا قابىلداۋ كەزىندە ۇمىتكەرلەر ۇلتتىق بىلىكتىلىك تەستىنەن ءوتۋى ءتيىس.

قوسا كەتسەك، سونىمەن قاتار تاياۋدا قازاقستاندا «پەداگوگ» كاسىبي ستاندارتى قابىلدانادى. ءمالىم بولعانداي، ونىڭ ەنگىزۋ جۇمىستارى اياقتالۋعا جاقىن.