بيىل كوكتەمدە ۆاليۋتا باعامىنىڭ كۇرت اۋىتقۋى سالدارىنان قىرعىزستاننىڭ جەڭىل ونەركاسىبى شىعىنعا شاش ەتەكتەن باتتى. رەسەي مەن قازاقستانداعى تاپسىرىس بەرۋشىلەر رۋبل مەن تەڭگەمەن ەسەپتەسسە، شيكىزاتتى دوللارعا ساتىپ الۋ قاجەت. سوندىقتان تىگىن سالاسى قيىن جاعدايعا ءتۇستى.
ساپاربەك اسانوۆ، «لەگپروم» قاۋىمداستىعىنىڭ پرەزيدەنتى:
- مىسالى تاڭەرتەڭ بەلگىلى ءبىر باعامعا كەلىسەتىن. الايدا ونى رۋبلمەن الىپ، دوللارعا اۋىستىرعاندا اقشادان قاعىلاتىن. ءتىپتى تابىس ورنىنا شىعىنعا تۇسەتىن بولدى. تاپ سول كەزدەگى تۇراقسىزدىق پەن ۆاليۋتا باعامىنىڭ كۇرت اۋىتقۋى قاتتى اسەر ەتىپ، كاسىپكەرلەر فابريكالارىنىڭ جۇمىسىن توقتاتا باستادى. جامان ايتپاي، جاقسى جوق.
باتىس ەلدەرى سالعان سانكسيالاردىڭ سالدارىنان كيىم تىگەتىن ءبىر جۇزدەن اسا برەند رەسەيدەن كەتتى. سوندىقتان بۇل ەل قىرعىز تىگىنشىلەرىن ولاردىڭ ورنىن تولتىرۋدى سۇراعان. رەسەيلىك نارىق وتە ۇلكەن بولعاندىقتان، قىرعىز فابريكالارى تاپسىرىس سانى ولاردىڭ مۇمكىندىگىنەن اساتىنىن بىرتىندەپ سەزە باستادى.
ساپاربەك اسانوۆ، «لەگپروم» قاۋىمداستىعىنىڭ پرەزيدەنتى:
- بىزدە ۇلكەن ءبىر ماسەلە تۋىندادى. جۇمىس ىستەيتىن ادامدار جەتىسپەيدى. تاپسىرىس سانى تىم كوپ. كاسىپورىندار دا كوپ، جاڭا فابريكالار سالىپ، ەسكىلەرىن كەڭەيتىپ جاتىر. ءبىراق وندا كوپ دەگەندە، ءتيىستى قىزمەتكەرلەر سانى تەك 60 پروتسەنتكە تولعان.
ستاتيستيكاعا سۇيەنسەك، قىرعىزستاندا تىگىنشىلىكپەن اينالىساتىن 900 كاسىپورىن بار. اراسىندا بىرنەشە عانا ادام جۇمىس ىستەيتىن شاعىن سەحتەر مەن ءبىر جارىم مىڭعا دەيىن قىزمەتكەرى بار فابريكالار بار. ماتا مەن فۋرنيتۋراسىن قىتاي مەن تۇركيادان جەتكىزەدى. ال ەڭ وزىق كومپانيالارداعى ءوندىرىس الەمدەگى سالا كوشباسشىلارىنىڭ قاتاڭ تالاپتارى بويىنشا ۇيىمداستىرىلعان.
ازامات ابيلەسوۆ، تىگىن فابريكاسىنىڭ مەنەدجەرى:
- وندىرىستەگى ءار كەزەڭنىڭ ءوز مەرزىمى بار. ول حرونومەتراج دەپ اتالادى. ياعني ءار بۇيىم سەكۋندتاپ بەلگىلەنگەن ۋاقىتتا دايىن بولۋى كەرەك. بۇل كورسەتكىشتەر ونىمدىلىگىمىزدى انىقتايتىن بىركۇندىك نورماعا كىرەدى. سوندىقتان قىزمەتكەرلەرىمىز ۋاقىتتى ءبىلسىن دەپ، ءار سەحكە ساعات ءىلىپ قويدىق.
جەڭىل ونەركاسىپ - ونىمدەرىنىڭ دەنى ەكسپورتقا كەتەتىن قىرعىزستانداعى جالعىز سالا. بولاشاعى بار ەكەنىن تۇسىنگەن ۇكىمەت 2000 -جىلدارى تىگىن كاسىپورىندارى ءۇشىن نەسيە بەرۋ ءتارتىبىن جەڭىلدەتكەن بولاتىن. بۇل سالانىڭ قارقىندى دامۋىنا نەگىزگى تۇرتكى بولدى.
اۆتورى: باقىت چەرماشيەۆ
www.24.kz