يندونەزيالىقتار احمەت بايتۇرسىن ۇلىنىڭ تۋىندىلارىمەن تانىستى
«ءىس- شاراعا «Dimash Indonesian Dears» جانكۇيەرلىك كلۋبىنىڭ مۇشەلەرى، دجاكارتانىڭ جالپى ورتا ءبىلىم بەرۋ مەكتەپتەرىنىڭ مۇعالىمدەرى، «Dompet Dhuafa» قايىرىلىمدىق قورىنىڭ وكىلدەرى، تانىمال يندونەزيالىق بلوگگەرلەردىڭ ءبىرى ليا ماليك، سونداي- اق يندونەزيا جازۋشىلار بىرلەستىگىنىڭ مۇشەسى، ءبىرقاتار روماندار مەن اڭگىمەلەردىڭ اۆتورى اسما ناديا قاتىستى. وندا ەلشىلىكتىڭ ديپلوماتتارى احمەت بايتۇرسىن ۇلىنىڭ ءومىربايانى، شىعارماشىلىعى جانە ساياسي قىزمەتى تۋرالى پرەزەنتاتسيا جاسادى. ۇلت ۇستازىنىڭ قازاق ءتىلى مەن ادەبيەتىنىڭ دامۋىنا قوسقان ۇلەسى تۋرالى دەرەكتى فيلم كورسەتىلدى»، - دەپ جازدى قازاقستاننىڭ سىرتقى ىستەر مينيسترلىگى.
سونىمەن قاتار، «Dimash Indonesian Dears» جانكۇيەرلىك كلۋبىنىڭ مۇشەسى تيتا كوسساتيتا ا. بايتۇرسىن ۇلىنىڭ «وقۋعا شاقىرۋ» ولەڭىن قازاق تىلىندە وقىپ بەرىپ، ونىڭ مازمۇنىن يندونەزيالىق تىلدە ايتىپ بەردى.