قىزىرحان باباقۇمار ۇلىنىڭ «التايدان الاتاۋعا كۇي بولىپ توگىلدىم» اتتى كۇي كەشى وتەدى

نۇر-سۇلتان. قازاقپارات - «قازاقستان اۆتورلار قوعامىنىڭ»، «قازاقستان رەسپۋبليكاسىنىڭ كۇيشىلەر وداعىنىڭ» مۇشەسى، قازاق مادەنيەتىنىڭ قايراتكەرى، بەلگىلى كۇيشى قىزىرحان باباقۇمار ۇلىنىڭ كۇي كەشى الماتى وبلىسى جامبىل اۋداندىق مادەنيەت ۇيىندە وتەدى.

ق. باباقۇمار ۇلىنىڭ شىعارماشىلىق كەشى «التايدان الاتاۋعا كۇي بولىپ توگىلدىم» دەپ اتالادى. كونسەرت 2022 -جىلدىڭ 22-قىركۇيەگى (بەيسەنبى) كۇنى ساعات 11:00-دە باستالادى.

ايتا كەتەيىك، قىزىرحان باباقۇمار ۇلى 1959 -جىلى قاراشادا ق ح ر-داعى التايدىڭ شەمىرشەك اۋىلىندا دۇنيەگە كەلگەن. ماماندىعى - پەداگوگ. ول «ىلە وقۋ-اعارتۋ ينستيتۋتىنىڭ» فيلولوگيا ماماندىعى بويىنشا جوعارى ساناتتاعى مۇعالىم دارەجەسىنىڭ يەگەرى. ەڭبەك جولىن جەمەنەي اۋداندىق №2-مەكتەبىندە ۇستازدىقتان باستاعان. كەيىننەن سول مەكتەپتىڭ باسشىسى، اۋداندىق «توپتەرەك» وقىتۋ ورتالىعىنىڭ مەڭگەرۋشىسى، جەمەنەي اۋداندىق وقۋ- اعارتۋ مەكەمەسىنىڭ ينسپەكتورى قاتارلى قىزمەتتەردى اتقارعان. قىزىرحان باباقۇمار ۇلى قازىر الماتى وبلىسى جامبىل اۋدانىندا تۇرادى.

ول «كۇي- كەرۋەن» دەگەن اتپەن 60-تان استام كۇيلەر توپتاستىرىلعان ەكى كۇي جيناعىنىڭ اۆتورى. ءوزىنىڭ جيىرمادان استام اۆتورلىق كۇيلەرى مەن بىرنەشە اندەرى بار. ق ر ۇلتتىق مۋزەيدىڭ ونەر مۇراعاتىنا 60-قا جۋىق كۇي، «دومبىرا» ۇلتتىق تەلەارناسىنا 15، «شالقار» راديوسىنىڭ التىن قورىنا 40-تان استام كۇيدى ەنگىزىپ، قازاق حالقىنىڭ رۋحاني قازىناسىنا ءوز ۇلەسىن قوسقان.

اۆتورى بەيسەن سۇلتان ۇلى