تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ قاتىسۋشىلاردى الەۋمەتتىك جەلىلەردە جانە قوعامدا تالقىلانىپ جاتقان دەپۋتاتتار ۇسىنىسىن قولداۋعا شاقىردى.
ءوز كەزەگىندە قوعامدىق كەڭەس مۇشەلەرى ەلورداعا بۇرىنعى اتاۋىن قايتارۋدى قولدادى. ولاردىڭ پىكىرىنشە، باس شاھارعا استانا اتاۋىن قايتارۋ ۇسىنىسىن ەسكەرۋ - بيلىك پەن حالىق اراسىنداعى ءوزارا قارىم- قاتىناستى، حالىق ۇنىنە قۇلاق اساتىن مەملەكەت تۇجىرىمداماسىنىڭ ىسكە اسىپ جاتقانىن ايعاقتايدى.
«تۇڭعىش پرەزيدەنت نۇرسۇلتان نازاربايەۆتىڭ مەملەكەتتىڭ قالىپتاسۋى جولىنداعى ءرولى ايرىقشا. ءبىز ءبىرىنشى پرەزيدەنتكە ريزامىز، ءبىراق اتاۋدى وزگەرتۋ ءىسى اسىعىس شەشىم بولدى. ونوماستيكالىق كوميسسيا استانا دەپ اتاۋ تۋرالى ءبىزدىڭ ۇسىنىسىمىزدى زەردەلەپ، ول تالاپتارعا ساي كەلەدى جانە ەڭ باستىسى، قوعامدى بىرىكتىرۋگە مۇمكىندىك بەرەدى دەپ قورىتىندى شىعاردى»، - دەدى مەملەكەت تاريحى ينستيتۋتى ديرەكتورىنىڭ ورىنباسارى بۇركىتباي اياعان.
ءماسليحات حاتشىسى ەرلان كاناليموۆ مالىمەتىنشە، ەلورداعا استانا اتاۋىن قايتارۋ بىرنەشە كەزەڭنەن ءوتۋى ءتيىس. باستاپقىدا ماسەلە قوعامدىق تىڭداۋلار مەن ءماسليحاتتىڭ كەزەكتەن تىس سەسسياسىندا قارالادى.
«وسى وتىرىستار ناتيجەسىندە ماقۇلدانعان نەمەسە ماقۇلدانباعان شەشىمدەرگە سايكەس، رەسپۋبليكالىق ونوماستيكالىق كوميسسيا وتىرىسى بولادى. ودان سوڭ قۇجاتتار ۇكىمەتكە جىبەرىلەدى. ۇكىمەت پرەزيدەنتتىڭ قول قويۋى ءۇشىن جارلىق جوباسىن جاسايدى. تەك جارلىق رەسمي تۇردە شىعىپ، وعان قول قويىلعان سوڭ ەلوردانىڭ تولىق اتاۋى وزگەرەدى دەپ ايتۋعا بولادى»، - دەپ ءتۇسىندىردى ەرلان كاناليموۆ.
سونىمەن قاتار ءماسليحات حاتشىسى ەلوردا اتاۋىن وزگەرتۋگە قاتىستى شىعىندارعا تۇسىنىك بەرگەن بولاتىن. ونىڭ ايتۋىنشا، سيفرلىق قۇجات اينالىمىنا كوشىپ جاتقانىمىزدى ەسكەرسەك، وندا شىعىندار از بولادى.
اۆتور
ءاليحان اسقار