اقتوبەدە كوپقاباتتى ۇيگە ديماش قۇدايبەرگەننىڭ مۋرالى سالىنادى
اقتوبەدە قالانى دامىتۋ جوسپارى تالقىلاندى. «قازاقستاننىڭ Q88 ۋربانيستەر قاۋىمداستىعى» قوعامدىق بىرلەستىگى شاھاردى اباتتاندىرۋ تەتىگىن ۇسىندى. تانىستىرىلىم كەزىندە ساراپشىلار قالا كوشەلەرىنە ون ارت- نىسان، شاعىن ارحيتەكتۋرالىق ءمۇسىن ورناتۋ جولىن ايتتى. سونىمەن بىرگە قابىرعالارعا سۋرەت سالۋ قاجەت. الاڭداردىڭ، ساياباقتاردىڭ ورنالاسۋ ديزاينىن دا كورسەتتى. قوعامدىق كەڭىستىكتى دامىتۋ جوباسى شەڭبەرىندە اۋە قورعانىسى كۇشتەرىنىڭ اسكەري ينستيتۋتى اۋماعىندا اشىق اسپان اياسىندا ۇشاقتار مۇراجايىن، امفيتەاتر، بالالار الاڭىن ورنالاستىرۋ ۇسىنىلدى. استانا ساياباعىنىڭ اۋماعىندا جاستار الاڭىن، قالاداعى تاۋەلسىزدىك داڭعىلىندا 2,5 شاقىرىمدىق ساياباق سالۋ دا نازاردا بولادى. بوكەنباي باتىر داڭعىلى بويىنان حالىقارالىق اۋەجايعا دەيىن سارماتتار داۋىرىنەن قازاقستان حاندىعىنا دەيىنگى تاريحىمىزدى بەينەلەيتىن ارت- نىساندار ورنالاستىرىلادى. اقتوبەدەگى كوپقاباتتى ۇيلەردىڭ قابىرعالارىنا ديماش قۇدايبەرگەنگە ارناپ مۋرال سالۋدى ۇسىندى.
«ديماشتى ەلىمىزدىڭ برەندى دەۋگە بولادى. اقتوبە — ونىڭ تۋعان جەرى. سوندىقتان جانكۇيەرلەرى ءبىزدىڭ قالاعا ءجيى كەلىپ تۇرادى. بۇل تۋريزم سالاسىن دامىتۋ ءۇشىن ۇلكەن مۇمكىندىك. ءبىز سونى بارىنشا پايدالانۋىمىز كەرەك. وبلىس ورتالىعى بارلىق تالاپقا ساي، دەمالۋ ءۇشىن بارىنشا قولايلى بولعانى ءجون»، - دەپ اتاپ وتكەن ە. توعجانوۆ .
سونداي- اق، ءوڭىر باسشىسى قوعامدىق كەڭىستىك پەن تۇرعىن ءۇي الاپتارىن دامىتۋ، قالانىڭ ەسكى بولىگىندەگى اۋلالاردىڭ اۋماعىن اباتتاندىرۋ سۇراقتارىنا ەرەكشە نازار اۋدارۋ كەرەك دەپ سانايدى. سوعان بايلانىستى جانقوجا باتىر، نەكراسوۆ، كەرەيەۆ كوشەلەرىنە رەكراتسيالىق ايماقتار جاساپ، تەمىرجول ۆوكزالى اۋماعى مەن سول ماڭداعى اۋلالاردى اباتتاندىرۋ جوبالارى ۇسىنىلدى. تانىستىرىلىمدى تىڭداپ شىققان ەرالى توعجانوۆ تۇزەتۋلەر ەنگىزىپ، جوبانىڭ جۇزەگە اسىرىلاتىن مەرزىمىن ناقتىلاۋدى تاپسىردى.
«قالا حالقى كۇن سايىن كوبەيىپ كەلەدى. سوندىقتان اقتوبەدە ءبىر مەزەتتە كەمىندە 15 مىڭ ادام جينالاتىن شارالاردى وتكىزۋگە ارنالعان ورىن بولۋ كەرەك. ۇسىنىلىپ وتىرعان جەر - ەلەك وزەنىنىڭ جاعاسى. وسى جۇمىسقا كىرىسۋ كەرەك. تۇرعىندار قۇر ءسوز بەن بوس ۋادەنى ەستىمەي، ناقتى جۇمىستى كورۋ كەرەك»، - دەدى وبلىس اكىمى.