پرەزيدەنت قاسىم-جومارت توقايەۆ ريم پاپاسى فرانتسيسكپەن ەلوردا اۋەجايىندا كەزدەستى.
كەزدەسۋ ءراسىمى بارىسىندا مەملەكەتتەر باسشىلارى ءبىر-بىرىنە ەكى ەلدىڭ دەلەگاتسيا مۇشەلەرىن تانىستىردى. سودان كەيىن قازاقستان پرەزيدەنتى مەن كاتوليك شىركەۋىنىڭ باسشىسى پرەزيدەنتتىك تەرمينالدىڭ كاميندى زالىندا قىسقاشا اڭگىمەلەستى.
قاسىم-جومارت توقايەۆ ريم پاپاسىنا ءىلتيپات بىلدىرە وتىرىپ، ونىڭ قازاقستانعا كەلۋگە شەشىم قابىلداعانى ءۇشىن شىن جۇرەكتەن العىس ايتتى.
- بۇل وقيعانىڭ تاريحي ماڭىزى بار ەكەنى ءسوزسىز. ءسىزدىڭ ساپارىڭىز، ەڭ الدىمەن بارشا قازاقستاندىقتىڭ نازارىن اۋداراتىنىنا كامىل سەنەمىن. ءسىزدىڭ ساپارىڭىزدىڭ اياسىندا مەملەكەتتىك اپپاراتتىڭ، ازاماتتىق قوعامنىڭ، ديپلوماتيالىق كورپۋستىڭ جانە ب ا ق- تىڭ وكىلدەرى قاتىساتىن ءىس-شارا وتەدى. بارلىعى ءسىزدىڭ سويلەيتىن ءسوزىڭىزدى اسىعا كۇتىپ وتىر. ءسىزدىڭ الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسۋىڭىز - زور ماڭىزى بار وقيعا. ءسىزدىڭ شاراعا ارنايى قاتىسۋىڭىز اتالعان فورۋمنىڭ تابىستى بولۋىنا ۇلكەن سەپتىگىن تيگىزەدى. جيىن قازىرگى الەمدەگى كۇردەلى كەزەڭدە، داعدارىستى جاعدايدا ءوتىپ جاتىر دەۋگە بولادى، - دەدى پرەزيدەنت.
كەزدەسۋدەن كەيىن جوعارى مارتەبەلى قوناقتىڭ كورتەجى اقورداعا باعىت الدى.