قازاقستانمەن ءوزارا ءتيىمدى ىنتىماقتاستىقتى ارتتىرۋدى جالعاستىرۋ كەرەك - شي جينپيڭ
بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭ «كازاحستانسكايا پراۆدا» گازەتىندە جاريالانعان ماقالاسىندا جازدى، دەپ حابارلايدى قازاقپارات.
«ءوزارا ءتيىمدى ىنتىماقتاستىقتى ارتتىرۋدى جالعاستىرۋ وتە ماڭىزدى. كەلەسى جىلى مەن قازاقستاندا ۇسىنعان «جىبەك جولى ەكونوميكالىق بەلدەۋىن» بىرلەسىپ سالۋ باستاماسىنا تۋرا 10 جىل تولادى. وسى ۋاقىت ارالىعىندا ء«بىر بەلدەۋ - ءبىر جول» باستاماسى تەوريالىق دامۋدان پراكتيكالىق ىسكە اسىرۋعا كوشتى»، - دەپ جازدى شي جينپيڭ ءوز ماقالاسىندا.
ق ح ر ءتوراعاسى اتاپ وتكەندەي، «ءبىر بەلدەۋ - ءبىر جول» باستاماسى ءوزىن حالىقارالىق ىنتىماقتاستىقتىڭ ينكليۋزيۆتى جانە اشىق الاڭى رەتىندە، الەمدىك قاۋىمداستىقتىڭ جالپى قولداۋىنا يە بولعان حالىقارالىق قوعامدىق يگىلىك رەتىندە كورسەتە الدى.
«كوۆيدتان كەيىنگى كەزەڭدە ءبىزدىڭ ەلدەرىمىز ينۆەستيسيالىق جانە ساۋدا راسىمدەرىن وڭايلاتۋ، باقىلاۋ- وتكىزۋ بەكەتى مەن ترانزيتتىك تاسىمالداردىڭ وتكىزۋ مۇمكىندىكتەرىن اشۋ، جاساندى ينتەللەكت، اۋقىمدى دەرەكتەر، سيفرلىق قارجى، ەلەكتروندى كوممەرتسيا، جاسىل ەنەرگەتيكا سياقتى سالالاردا جاڭا ءوسۋ نۇكتەلەرىن دامىتۋ ماقساتىندا ء«بىر بەلدەۋ - ءبىر جول» بىرلەسكەن جوباسىندا ءارى قاراي العا جىلجۋعا ءتيىس. ءبىز تۇراقتى دامۋ ءۇشىن جوعارى ستاندارتتاردى قولدانا وتىرىپ، الەۋمەتتىك ماڭىزى بار جوبالاردى ىسكە اسىرىپ، پراگماتيكالىق ىنتىماقتاستىقتى ساپالى جاڭا دەڭگەيگە كوتەرىپ، جاھاندىق دامۋ جونىندەگى باستامانى ىسكە اسىرۋعا ىقپال ەتۋىمىز قاجەت جانە الەمدىك ەكونوميكانى قالپىنا كەلتىرۋگە ورتاق ۇلەسىمىزدى قوسۋىمىز كەرەك»، - دەپ ەسەپتەيدى شي جينپيڭ.
ەسكە سالساق، قىتاي باسشىسى 14-قىركۇيەك كۇنى قازاقستانعا مەملەكەتتىك ساپارمەن كەلەدى.