جاڭاارقادا اقسەلەۋ سەيدىمبەكتىڭ كەشە قويىلعان ەسكەرتكىشى بۇزىلىپ جاتىر
بۇل تۋرالى ۇلىتاۋ وبلىسى اكىمىنىڭ ورىنباسارى عالىمجان قۇسمانعالي ءوزىنىڭ Facebook تەگى رەسمي پاراقشاسىندا جازدى، دەپ حابارلايدى قازاقپارات ءتىلشىسى.
«كەشەدەن بەرى ولقى شىققان ەسكەرتكىش جايلى قازاقتىڭ ءار ازاماتى ءوز ويىن ايتىپ، جاناشىرلىق تانىتىپ جاتىر. كەشە ەسكەرتكىشتى ورنىنان الىپ، ءمۇسىندى قايتا جاڭعىرتۋ شارالارىن قولداناتىنىمىز جايلى ايتقان بولاتىنمىن. بۇگىن اقسەلەۋ اعامىزدىڭ اعايىن- تۋىسىمەن كەزدەسىپ، بارلىق جاعدايدى ءتۇسىندىردىم. سونىمەن قاتار، ۇسىنىسىمدى ايتتىم. ءدال قازىر كوڭىلگە قونىمسىز جاسالعان ءمۇسىندى بۇزۋ جۇمىستارى باستالدى»، - دەپ جازدى ءوڭىر اكىمىنىڭ ورىنباسارى.
ايتا كەتەيىك، كەشە قازاقتىڭ ءبىرتۋار تۇلعاسى اقسەلەۋ سەيدىمبەكتىڭ 80 جىلدىق مەرەيتويىنا وراي ۇلىتاۋ وبلىسىنىڭ جاڭاارقا اۋدانىندا ەسكەرتكىش اشىلعان بولاتىن.
عالىمجان قۇسمانعاليدىڭ اقپاراتىنشا، تۋىندى اقسەلەۋ سلان ۇلىنىڭ ءىنىسى اسىلحان سەيدىمبەكتىڭ جەكە قاراجاتىنا جاسالعان.
كەيىن جازۋشى قۇرمەتىنە قويىلعان ەسكەرتكىش جەلى قولدانۋشىلارى مەن تۇرعىنداردىڭ سىنىنا ۇشىرادى. ولاردىڭ پىكىرىنشە، تاس تۇعىر كوركەمدىك تۇرعىدان ساپاسىز جاسالعان.
وسىعان بايلانىستى كەشە ۇلىتاۋ وبلىسى اكىمىنىڭ ورىنباسارى عالىمجان قۇسمانعالي ەسكەرتكىش الىنىپ تاستالىپ، ورنىنا باسقاسىن قوياتىنىن مالىمدەگەن ەدى.
تيىسىنشە ونى بۇزۋ جۇمىستارى بۇگىن قولعا الىنعان.