تالقىدان سوڭ قۇجاتتى پارلامەنت ءماجىلىسىنىڭ قاراۋىنا جىبەرۋ جوسپارلانعان، دەپ حابارلايدى قازاقپارات ءتىلشىسى.
«زاڭ جوباسى ەكسپورتتىق-كرەديتتىك اگەنتتىكتىڭ قۇقىقتىق جاعدايىن، قىزمەت ءتارتىبىن، ماقساتىن، مىندەتتەرى مەن وكىلەتتىگىن، ونىڭ مەملەكەتتىك ورگاندارمەن، كاسىپكەرلىك سۋبەكتىلەرىمەن وتاندىق شيكىزاتتىق ەمەس تاۋارلاردىڭ ەكسپورتىن دامىتۋ جانە ىلگەرىلەتۋ سالاسىنداعى ءوزارا ءىس-قيمىل ءتارتىبىن ايقىندايدى»، - دەلىنگەن مينيسترلىك ۇسىنعان زاڭ جوباسىندا.
قۇجاتقا سايكەس، ەكسپورتتىق-كرەديتتىك اگەنتتىك مىناداي مىندەتتەردى اتقارادى:
- وتاندىق ەكسپورتتاۋشىلار مەن شەتەلدىك ساتىپ الۋشىلار جاساساتىن ەكسپورتتىق مامىلەلەردى ەرىكتى ساقتاندىرۋ ارقىلى شيكىزاتتىق ەمەس تاۋارلاردىڭ (جۇمىستاردىڭ، كورسەتىلەتىن قىزمەتتەردىڭ) ەكسپورتىن ىنتالاندىرۋ؛
- وتاندىق ەكسپورتتاۋشىلاردى جانە ولاردىڭ شيكىزاتتىق ەمەس تاۋارلارىن ساتىپ الاتىن شەتەلدىك ساتىپ الۋشىلاردى قارجىلاندىرۋ كەزىندە ەكىنشى دەڭگەيدەگى بانكتەردىڭ جانە قارجى ۇيىمدارىنىڭ، قازاقستاننىڭ دامۋ بانكىنىڭ، ونەركاسىپتى دامىتۋ قورىنىڭ تاۋەكەلدەرىن ساقتاندىرۋ ارقىلى ەكسپورتتى قارجىلاندىرۋدى قامتاماسىز ەتۋ؛
- وتاندىق ەكسپورتتاۋشىلاردى قارجىلىق قولداۋدى كەڭەيتۋ ءۇشىن ەرىكتى ساقتاندىرۋ شارتتارى بويىنشا تاۋەكەلدەردى قازاقستاندىق جانە شەتەلدىك ساقتاندىرۋ ۇيىمدارىنا، وزگە دە ەكسپورتتىق-كرەديتتىك اگەنتتىكتەرگە قابىلداپ، قايتا ساقتاندىرۋعا بەرۋ؛
- وتاندىق ەكسپورتتاۋشىلارعا، يمپورتتاۋشىلارعا نەمەسە قارجى ۇيىمدارىنا، شەتەلدىك كونتراگەنتتەرگە، شيكىزاتتىق ەمەس تاۋارلاردىڭ تاپسىرىس بەرۋشىلەرىنە ەكسپورتتىق مامىلەلەر بويىنشا كەپىلدىكتەر بەرۋ؛
- ەكسپورتتى الدىن الا قارجىلاندىرۋ ماقساتىندا ەكىنشى دەڭگەيلى بانكتەردە، قارجى ينستيتۋتتارىندا شارتتى تۇردە اقشا ورنالاستىرۋ ارقىلى شيكىزاتتىق ەمەس تاۋارلاردىڭ ەكسپورتىن ىنتالاندىرۋ؛
- ينۆەستيتسيالاۋ ەلىنىڭ اۋماعىندا ينۆەستيتسيالىق سالىمداردى جۇزەگە اسىراتىن ق ر رەزيدەنتتەرىنىڭ ينۆەستيتسيالارىن ساقتاندىرۋ؛
- وتاندىق ەكسپورتتاۋشىلاردىڭ باسەكەگە قابىلەتتىلىگىن ارتتىرۋ ءۇشىن شيكىزاتتىق ەمەس تاۋارلاردى ەكسپورتقا شىعارۋدا ولارعا سەرۆيستىك-اقپاراتتىق قولداۋ كورسەتۋ؛
- رەسپۋبليكا ەكونوميكاسىنىڭ تۇراقتى دامۋىنا ىقپال ەتەتىن ونەركاسىپتىك-يننوۆاتسيالىق جوبالاردى ىسكە اسىرۋعا قاتىسۋ جانە باسقا دا مىندەتتەر.
جوسپار بويىنشا ەكسپورتتىق-كرەديتتىك اگەنتتىك سىرتقى نارىققا تالداۋ جۇرگىزۋ، نەسيە جانە ليزينگتىك مامىلەلەر نەگىزىندە بەرىلەتىن سىياقى مولشەرلەمەسىن سۋبسيديالاۋ فۋنكسيالارىن اتقارادى. سونىمەن قاتار، قۇرىلۋى مۇمكىن ۇيىم شيكىزاتتىق ەمەس وتاندىق تاۋارلاردى ساتىپ الۋعا نيەتتى شەتەلدىك كومپانيالاردى ىزدەۋمەن، ولاردى تارتۋمەن اينالىسادى. دەگەنمەن جاڭا زاڭعا سايكەس، ەكسپورتتىق-كرەديتتىك اگەنتتىككە كاسىپكەرلىك قىزمەت رەتىندە مامىلەلەردى جۇزەگە اسىرۋعا جانە وپەراتسيالاردى جۇرگىزۋگە تىيىم سالىنادى.
زاڭ جوباسى 22- قىركۇيەككە دەيىن اشىق تالقىعا شىعارىلعان. كەيىن پارلامەنتتىڭ تومەنگى پالاتاسىنىڭ قاراۋىنا جىبەرىلەدى.