اتالعان ايماقتاردىڭ اكىمدىگى قابىلداعان ءتيىستى شەشىم «اشىق» نقا سايتىنا شىقتى، دەپ حابارلايدى قازاقپارات ءتىلشىسى.
«تابيعي جانە تەحنوگەندىك سيپاتتاعى قاۋىپتىڭ تۋىنداۋىنا بايلانىستى دالا جانە ورمان ورتتەرىن ءسوندىرۋدى ۇيىمداستىرۋ، سونداي-اق كاتونقاراعاي اۋدانىنداعى ەلدى مەكەندەردى ءورت شالماس ءۇشىن توتەنشە جاعداي جاريالانسىن»، - دەلىنگەن كاتونقاراعاي اۋدانى اكىمدىگىنىڭ ۇسىنعان شەشىم قۇجاتىندا.
سونىمەن قاتار، 2-قىركۇيەكتە التاي اۋدانى مالەيەۆكا اۋىلدىق وكرۋگىنىڭ اۋماعىندا تۇتانعان ءورت سالدارىنان اتالعان اۋماقتا دا توتەنشە جاعداي ەنگىزىلمەك.
«شىعىس قازاقستان وبلىسى التاي اۋدانى مالەيەۆكا اۋىلدىق وكرۋگىنىڭ اۋماعىندا «زىريان ورمان شارۋاشىلىعى» ك م م، بىكوۆو ورمانشىلىعى 92، 93، 94، 90 كۆارتالدارىندا ءشوپ، بۇتا جانە اعاشتار جانىپ جاتىر. قازىرگى ۋاقىتتا تاۋلى جەر بولعاندىقتان جانە مەتەوجاعدايعا بايلانىستى ءورتتى ءسوندىرۋ كۇردەلەنە تۇسكەن. ءورت شارپىعان اۋماقتىڭ كولەمى - 800 گەكتار. ەلدى مەكەندەرگە ءقاۋىپ جوق. ءورتتى سوندىرۋگە 29 تەحنيكا جۇمىلدىرىلدى. الدىن الا ەسەپ بويىنشا ورمان شارۋاشىلىعىنا كەلگەن شىعىن سوماسى - 68738161 تەڭگە»، - دەپ كورسەتىلگەن التاي اۋدانى اكىمدىگىنىڭ شەشىمىندە.
قوس اۋدان بويىنشا توتەنشە جاعداي جاريالاۋ تۋرالى شەشىم بۇگىن كۇشىنە ەنەدى.