اباي وبلىسىنىڭ دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى مارات ساندىبايەۆتىڭ ايتۋىنشا، ورتتەن زارداپ شەككەن امانگەلدى تۇرلىبەكوۆ سەمەيدەگى جەدەل جاردەم اۋرۋحاناسىنىڭ جانساقتاۋ بولىمىندە جاتىر. ناۋقاستىڭ جاعدايى اۋىر.
كەشەدەن بەرى ءورت ءسوندىرۋشى ءۇشىن جەرلەستەرى مەديتسينالىق مەكەمەگە كەلىپ، قان وتكىزىپ جاتىر.
«قازىر بىزدە قان كومپونەنتتەرى جەتكىلىكتى مولشەردە. تاپسىرعان ازاماتتاردىڭ قانى تەك ورتتەن زارداپ شەككەن ادامعا عانا ەمەس، سونىمەن قاتار وبلىستىڭ باسقا دا اۋرۋحانالارىندا ەمدەلىپ جاتقان كوپتەگەن ناۋقاستارعا كومەكتەسەدى»، - دەدى مارات ساندىبايەۆ.
ونىڭ ايتۋىنشا، قاندى ەرىكتى تۇردە تاپسىرۋشىلارعا ارنايى مەديتسينالىق پۋنكتەر جۇمىس ىستەپ تۇر. قان تاپسىرۋعا نيەتى بار تۇرعىندار سەمەي قالاسىنىڭ قان ورتالىعىنا - سەچەنوۆا كوشەسى، 4-مەكەنجايى بويىنشا بارا الادى. انىقتاما تەلەفونى - 87222421534.
ەسكە سالساق، اباي وبلىسى جارما اۋدانىندا 3 ءورت ءسوندىرۋشىنى كۇيىك شالىپ، ونىڭ بىرەۋى كوز جۇمعان.
دەنەسىن كۇيىك شالعان ەكى ءورت ءسوندىرۋشىنىڭ ءبىرىنىڭ جاعدايى اۋىر.
اباي وبلىسىنىڭ اكىمى نۇرلان ۇرانحايەۆ قازا بولعان ءورت ءسوندىرۋشىنىڭ وتباسىنا قاجەتتى كومەك كورسەتىلەتىنىن ءمالىم ەتكەن.
ولارعا 3 بولمەلى پاتەر بەرىلەتىن بولدى.