ءبىراق ءحال ۇستىندە جاتقان ەليزاۆەتا ەكىنشىنىڭ دەنساۋلىعى جاقسارمادى. ەليزاۆەتا ەكىنشى ۇزاق ءارى ماعىنالى عۇمىر كەشتى. ول بيلىك ەتكەن جىلدارى ەكىنشى دۇنيەجۇزىلىك سوعىستان كەيىن ەل ەڭسەسىن تىكتەدى. ۇلى بريتانيا يمپەريا بولۋىن توقتاتتى، ءبىراق ۇلتتار دوستاستىعى ۇيىمىنا مۇشە بولدى. ەۋروپالىق وداق قۇرامىنا كىرىپ، قايتا شىعىپ ۇلگەردى. ول باسشىلىق ەتكەن جىلدارى 15 پرەمەر-مينيستر اۋىستى.
«وسى اپتانىڭ باسىندا پاتشايىم مەنى ءوزىنىڭ پرەمەر-ءمينيسترى ەتىپ تاعايىنداۋ ارقىلى ءوز مىندەتىن ورىنداعان بولاتىن. ءبىز ءۇشىن بۇل ورنى تولماس ۇلكەن قايعى، ءبىراق پاتشايىم ەليزاۆەتا ەكىنشى ارتىنا ۇلكەن مۇرا قالدىردى. ءبىزدىڭ مەملەكەتىمىز ول باسقارعان جىلدارى ءوسىپ وركەندەدى. بريتانيا بۇگىندە پاتشايىمنىڭ ارقاسىندا ۇلى ەل بولىپ تۇر»، دەيدى ۇلى بريتانيا پرەمەر-ءمينيسترى ليز تراسس.
بۋكينگەم سارايىنىڭ توبەسىندەگى تۋ تومەن ءتۇسىرىلدى. بىرىككەن كورولدىك، ودان قالدى بۇكىل الەم ورنى تولماس قايعىعا ورتاقتاسىپ جاتىر. قارالى حابار جاريا ەتىلگەننەن كەيىن ساراي قاقپاسىنىڭ الدىنا مىڭداعان ادام جينالدى. كۇن جاۋىن-شاشىندى بولعانىنا قاراماستان ولار گۇل شوقتارىن اكەلىپ، كوزدەرىنە جاس الىپ جاتتى.
- ءيا، وتە جاعىمسىز جاڭالىق. سەنە الار ەمەسپىن. ەڭ ۇزاق جاساعان مونارحتىڭ قايتىس بولعانى وتە وكىنىشتى.
- 96 - وتە جاقسى جاس. ول ەكىنشى دۇنيەجۇزىلىك سوعىستان كەيىنگى ماڭىزدى ساتتەردىڭ اجىراماس بولىگى بولا ءبىلدى جانە ءبىز ونى ساعىنامىز. پاتشايىمنىڭ سوڭىندا ۇلكەن وتباسى قالدى. ەليزاۆەتا ەكىنشىنىڭ ءتورت بالاسى، سەگىز نەمەرەسى جانە ون ەكى شوبەرەسى بار. ەندى جاڭا پاتشا رەتىندە ۇلكەن ۇلى 73 جاستاعى چارلز ءتاج كيمەك. ول بريتان تاريحىندا تاققا وتىرعان ەڭ ەگدە جاستاعى مۇراگەر. ەلدە باستالعان ۇلتتىق ازا تۇتۋ 10 كۇنگە سوزىلىپ، سودان كەيىن عانا جەرلەۋ ءراسىمى وتپەك. قوشتاسۋ ءراسىمى الدىن الا دايىندالعان «لوندون كوپىرى» اتتى وپەراتسياعا سايكەس ۇيىمداستىرىلادى. پاتشايىمنىڭ جەكە حاتشىسى پرەمەر مينيسترگە «لوندون كوپىرى قۇلادى» دەپ بەلگى بەرگەننەن كەيىن ۇكىمەت باسشىسى جاڭا پاتشامەن كەزدەسۋ وتكىزەدى.
سودان كەيىن عانا تاققا وتىرعىزۋ ءراسىمى باستالادى. بۇگىن لوندون ۋاقىتى بويىنشا كەشكى التىدا جاڭا مونارح ۇلتقا ۇندەۋ جاساۋى كەرەك. قايتىس بولعاننان كەيىنگى ەكىنشى كۇنى پاتشايىمنىڭ تابىتى بۋكينگەم سارايىنا جەتكىزىلەدى. ءۇشىنشى كۇنى تابىت ۇلى بريتانيا بويىنشا ساپارعا اتتانادى. ءداستۇر سونداي.