الەمگە تانىمال وپەرا ءارتىسى سۋمي استانادا ونەر كورسەتەدى - فوتو
بۇگىن ەلورداداعى «استانا وپەرا» تەاترىندا ح مەرەيتويلىق ماۋسىم باستالادى.
اتالعان ونەر وشاعى وكىلدەرىنىڭ ايتۋىنشا، جاڭا ماۋسىمنىڭ اشىلۋىندا وپەرا ارتىستەرى قازاق، كورەي جانە باتىس ەۋروپالىق شىعارمالاردى ورىندايدى. ولاردىڭ قاتارىندا ا. جۇبانوۆ پەن ل. حاميديدىڭ «اباي» وپەراسىنان كوپشىلىكتىڭ ءسۇيىپ تىڭدايتىن «تويباستار» ساحنالىق كورىنىسى، ج. وففەنباحتىڭ «گوفمان ەرتەگىلەرى» وپەراسىنان وليمپيا شۋماقتارى، ف. لەگاردىڭ «كۇلكى ەلى» وپەرەتتاسىنان حانزادا سۋ حونگتىڭ ارياسى، «پۋريتاندىقدار» وپەراسىنان ريكاردونىڭ ارياسى جانە تاعى باسقا كوپتەگەن تانىمال تۋىندىلار بار.
«وسىدان 10 جىل بۇرىن العاش رەت الماتىدا بولدىم. قىسقى ازيا ويىندارىنىڭ اشىلۋىنا قاتىستىم. ەكىنشى رەت كەلگەنىمدە ەلوردادا بولدىم. مىنە، بۇيىرىپ قازاقستانعا ءۇشىنشى رەت كەلىپ وتىرمىن. بيىل كورەيا مەن قازاقستان اراسىنداعى ديپلوماتيالىق قارىم- قاتىناستىڭ ورناعانىنا 30 جىل تولىپ وتىر. وسى ورايدا قازاقستاندا تاعى ونەر كورسەتۋدىڭ ءساتى تۇسكەنىنە قۋانىشتىمىن. تەك ءارتىس ەمەس بەيبىتشىلىك پەن دوستىقتى قولدايتىن ادام رەتىندە دە»، - دەدى ايگىلى وپەرا ءارتىسى سۋمي چو «استانا وپەرا» تەاترىندا وتكەن باسپا ءسوز ءماسليحاتىندا.
سونداي-اق ءارتىس قازاقستاندىق وپەرا انشىلەرىنىڭ ونەرىن جوعارى باعالايتىنىن ايتتى.
«مەن الەم ەلدەرىن ارالاپ ونەر كورسەتىپ كەلەمىن. قازاقستان مەن ونىڭ مادەنيەتىنە دەگەن قىزىعۋشىلىعىم جوعارى. قازاق اندەرىن ورىنداعىم كەلەدى. ديماش قۇدايبەرگەنمەن جاقسى ارالاسىپ تۇرامىز. وسى جولى نۇر-سۇلتان قالاسىنا كەلە جاتقاندا ۇشاقتا ديماشتىڭ ونەرىن تاماشالاپ كەلدىم»، - دەيدى ول.
بۇگىن سۋمي چو «استانا وپەرا» تەاترى ساحناسىندا قازاقستاندىق ازامات جىلتىركوزوۆ، مەدەت شوتابايەۆ، تاتيانا ۆيتسينسكايا جانە تاعى باسقا وپەرا ارتىستەرىمەن بىرگە ونەر كورسەتەدى.
ايتۋلى ونەر كەشىنىڭ حور جانە وركەستر ديريجەرى - قازاقستاندىق ماەسترو الان بورىبايەۆ.
«ءبىز ءۇشىن الەمگە ايگىلى سۋمي چو حانىممەن ءبىر ساحنادا ونەر كورسەتۋ باقىت. ەرتەڭ ول كىسى ورىندايتىن ءار شىعارمانىڭ ورنى بولەك ءارى ەرەكشە. الەمدىك دەڭگەيدەگى وپەرا ءارتىسىنىڭ قازاقستاندىق كورەرمەندەر ءۇشىن ونەر كورسەتەتىنە قۋانىشتىمىز»، - دەيدى ول.
اۆتور داۋلەت ىزتىلەۋ