ەلشىلىك عيماراتىندا وتكەن ديپلوماتتار مەن ەلشىلىك جانىنداعى اسكەري اتتاشە كەڭسەسىنىڭ قىزمەتكەرلەرى، نوۆگورود وبلىسى گۋبەرناتورىنىڭ ءبىرىنشى ورىنباسارى ەۆگەنيي بوگدانوۆ جانە رەسەيلىك ىزدەۋ قوزعالىسىنىڭ وكىلدەرى قاتىستى.
قالدىقتاردى وتكەن جازدا نوۆگورود وبلىسىنىڭ دەميانسكيي اۋدانىندا «ناحودكا» ىزدەۋ وتريادىنىڭ جاۋىنگەرلەرى تاپقان. سولداتتىڭ مەدالونىنداعى جازبا جاقسى ساقتالعاندىقتان، ونىڭ جەكە باسىن انىقتاۋ مۇمكىن بولعان.
«ول 1916 -جىلى وڭتۇستىك قازاقستان وبلىسى جۋالى اۋدانىندا (قازىرگى جامبىل وبلىسى جۋالى اۋدانى) تۋعان ساپارباي يماحايەۆ بولىپ شىقتى. 1939 -جىلى سايرام رۆك اسكەرىنە شاقىرىلىپ، 1943 -جىلى قاڭتاردا حابارسىز كەتكەن.
قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگى مەن «Atamnyn Amanaty« قوعامدىق بىرلەستىگىنىڭ كومەگىمەن جاۋىنگەردىڭ تۋىستارى تابىلدى. جاقىن ارادا ونىڭ سۇيەگى تۋعان جەرىنە جەتكىزىلىپ، قۇرمەتپەن جەرلەنەتىن بولادى»، - دەلىنگەن حابارلامادا.
قازاقستاننىڭ رەسەيدەگى ەلشىلىگىنىڭ اسكەري اتتاشەسى ەرجان ەرمەكبايەۆتىڭ ايتۋىنشا، يماحايەۆتار وتباسىندا ءۇش اعايىندىنىڭ ءابدىبايى سوعىستان ورالعان، ال ساپارباي مەن ءابىش حابارسىز كەتكەن. وسى كەزگە دەيىن الدىمەن اناسى دانا، كەيىن تۋىستارى ولار تۋرالى مالىمەت ىزدەگەنىمەن، ناتيجە بولماعان.
جاۋىنگەرلەردىڭ سۇيەكتەرىن تابۋ بويىنشا قازاقستاندىق جانە رەسەيلىك ىزدەۋ توپتارىنىڭ بىرلەسكەن جۇمىسى الداعى ۋاقىتتا جالعاساتىن بولادى.