بۇعان دەيىن ەۋروپانىڭ ءبىرقاتار ەلى وسىنداي تاجىريبەنى باستاعان. كەيىنگى كەزدە كوپ ەلدە بۇل باستاما ءجيى تالقىلانىپ ءجۇر.
Massaget.kz ءتىلشىسى ءتورت كۇندىك جۇمىس رەجيمى تۋرالى باياندايدى.
وتكەن عاسىردا پايدا بولعان باستاما
ءتورت كۇندىك جۇمىس رەجيمى وتكەن عاسىردا پايدا بولعان. انگليالىق Roundpay Metal Finishers كومپانياسى 1965-جىلى اپتاسىنا ءتورت كۇندىك جۇمىس رەجيمىن ەنگىزگەن.
اپتاداعى جۇمىس كۇنىن قىسقارتۋ ارقىلى كومپانيا باسشىلىعى الەۋمەتتىك جانە كوممۋنالدىق شىعىندى ازايتپاق بولىپتى. ءبىراق اپتاسىنا 40 ساعات جۇمىس ساقتالعان، ياعني جۇماداعى ۋاقىت قالعان كۇندەرگە بولىنگەن.
كومپانيا سول كەزدەگى ەسەبىندە بۇل تاجىريبە ءساتتى بولعانىن جازعان. كەيىن مۇنداي باستامانى كەي كومپانيا دا قولدانىپ كورگەن.
جۇمىسشىلاردىڭ بوس ۋاقىتى 50 پايىز بولعان
كەيىنگى ون جىلدىقتا ءتورت كۇن جۇمىس ىستەۋگە اۋىسقاندار نە اۋىسۋعا تىرىسقاندار كوپ بولدى. مىسالى، 2008-جىلى امەريكالىق يۋتا شتاتىندا جۇمىسشىلار دۇيسەنبىدەن بەيسەنبىگە دەيىن كۇنىنە ون ساعات جۇمىس ىستەي باستاعان. مۇندا دا ماقسات - ەلەكتر، جىلۋ، جانارمايدى ۇنەمدەۋ. ءبىراق، Governing مالىمەتىنشە، 2011-جىلى حالىقتىڭ شاعىمىنان كەيىن شتات بۇل باستاماسىنان باس تارتتى.
ال 2013-جىلى گامبيا پرەزيدەنتى يايا دجاممە ەل ءتورت كۇندىك جۇمىس اپتاسىنا اۋىسقانىن حابارلاعان. جۇمىس تاڭعى 8 دەن باستالىپ، 18:00 دە بىتەدى. جۇما دەمالۋعا، دۇعا وقۋعا، اۋىل شارۋاشىلىعىمەن اينالىسۋعا ارنالدى. الايدا، BBC اقپاراتىنا سۇيەنسەك، 2017-جىلى جاڭا پرەزيدەنت اداما بەررون بەس كۇندىك جۇمىستى قايتا بەكىتتى.
2016-جىلى رۋمىنياداعى IT- كومپانيالاردىڭ ءبىرى دە ءتورت كۇن جۇمىس ىستەۋگە كوشكەن. ءبىراق دەمالىس - جۇما ەمەس، دۇيسەنبى. سول كەزدە كومپانيا جۇما جەمىستى كۇنگە اينالعانىن، ال جۇمىسشىلاردىڭ بوس ۋاقىتى 50 پايىزعا ارتقانىن حابارلاعان.
جۇمىس از بولسا، پايدا كوپ
Nzherald.co.nz مالىمەتىنشە، 2018-جىلى جاڭا زەلاندياداعى Perpetual Guardian كومپانياسى دا ەكسپەريمەنت جاساپ كورگەن. كومپانيانىڭ 240 قىزمەتكەرى اپتاسىنا ءتورت كۇن 30 ساعات جۇمىس ىستەۋگە كوشكەن.
ناتيجەسىندە جۇمىس ۋاقىتى ازايعان قىزمەتكەرلەر پايدا كوپ تۇسىرە باستاعان. ياعني، جۇمىسشىلار بەلسەندى بولا تۇسكەن. جۇمىس بارىسىنداعى كەزدەسۋلەر دە ازايعان، سەبەبى قىزمەتكەر بارلىق مىندەتىن ورىنداۋ ءۇشىن ۋاقىتتى ۇنەمدەۋگە كوشكەن.
سونىمەن قاتار، قىزمەتكەرلەردىڭ كۇيزەلىسكە ءتۇسۋى 45 تەن 38 پايىزعا ازايعان. ال جۇمىس پەن جەكە ءومىر اراسىنداعى ۇيلەسىم 54 تەن 78 پايىزعا ارتقان.
وسى تاجىريبەنى باعالاعاننان كەيىن كومپانيا تولىعىمەن ءتورت كۇندىك جۇمىس اپتاسىنا اۋىسقان. ءبىراق بارلىق قىزمەتكەردىڭ جالاقىسى ساقتالعان. ءوندىرىس دەڭگەيى كوتەرىلىپ، تابىس قىسقارماعان، ەسەسىنە كومپانيا ەنەرگيا، كوممۋنالدىق شىعىنىن ازايتىپتى. جاڭا زەلانديانىڭ ەڭبەك ءمينيسترى يەن ليس-گەلوۋي بۇل باستاماعا جوعارى باعا بەرگەن.
يسلانديا جۇمىس كۇنىن ازايتتى
ر ي ا نوۆوستي مالىمەتىنشە، بىلتىر شىلدەنىڭ باسىندا يسلانديادا ءتورت كۇندىك جۇمىس اپتاسى بەكىتىلدى. بۇل ەل 2015 جانە 2017-جىلدارى تاجىريبە وتكىزىپ، ونىڭ جەمىستى بولعانىن كورگەن. سول كەزدە 2,5 مىڭعا جۋىق جۇمىسشى اپتاسىنا 35-36 ساعات جۇمىس ىستەگەن.
ال بيىل بۇكىل ەلدە جۇمىس ۋاقىتى ءتورت كۇنگە قىسقارتىلدى. سەبەبى جۇمىس ۋاقىتى ازايسا دا، قىزمەتكەرلەر جۇمىسى ناشارلاماعان. كۇيزەلىس دەڭگەيى تومەندەگەن، ال دەنساۋلىق جانە پسيحولوگيالىق تۇرعىدان جاقسارعان.
«تەكسەرىلگەن جۇمىس ورىندارىنىڭ كوبىندە ونىمدىلىك بۇرىنعى كۇيىندە قالدى نەمەسە كەرىسىنشە ءوستى»، - دەلىنگەن Alda قاۋىمداستىعىنىڭ ەسەبىندە.
قاۋىمداستىق مالىمەتىنشە، يسلانديادا ەڭبەككە جارامدى حالىقتىڭ 86 پايىزى جاڭا كەستە بويىنشا جۇمىس ىستەپ جاتىر.
بۇگىندە باسقا ەلدەر دە وسى تاجىريبەگە كوشۋدى ويلاستىرىپ وتىر. مىسالى، LADBible مالىمەتىنشە، بىلتىر ناۋرىزدا يسپانيا دا كومپانيالارعا اپتاسىنا ءتورت ساعات جۇمىس ىستەۋگە رۇقسات بەرگەن. بۇل ەلدەگى كاسىپوداق كونگرەسىنىڭ زەرتتەۋى بويىنشا، تاجىريبە كەزىندە قىزمەتكەرلەر جۇمىسى ونىمدىرەك بولعان. تەك جۇمىس كۇنى 8 ەمەس، 10 ساعاتقا سوزىلادى.
جاڭا زەلانديا مەن ۇلى بريتانيا دا جۇمىس كۇنىن قىسقارتۋدى ويلاستىرىپ وتىر. جاپونيا بيلىگى كومپانيالار ءتورت كۇندىك جۇمىس اپتاسىنا اۋىسۋى ءۇشىن بىرنەشە باعدارلاما ويلاپ تاپقان.
عالىمدار نە دەيدى؟
ۆەنا ۋنيۆەرسيتەتىنىڭ الەۋمەتتانۋشىسى توماس رەشتىڭ ايتۋىنشا، اپتادا جۇمىس كۇنى كوپ بولسا، ونىمدىلىك تە سونداي جوعارى بولادى دەگەندى بىلدىرمەيدى.
«ءتورت كۇندىك جۇمىس اپتاسى جاعدايىندا قىزمەتكەرلەردىڭ كۇش-جىگەرى مەن ەڭبەك ءونىمى ارتادى - جۇرت شابىتتانىپ، جەمىستى جۇمىس ىستەيدى. سونداي-اق، ادام 40 ساعاتتىق رەجيمدەگى ونىمدىلىكتى ساقتاپ قالۋعا تىرىسادى. سوندىقتان ولار جۇمىسقا كوبىرەك دەن بەرىپ، ۋاقىتتى بوسقا وتكىزبەۋگە ۇمتىلادى»، - دەدى ول BBC- گە.
ۇلى بريتانيالىق Autonomy زەرتتەۋ ورتالىعىنىڭ وكىلى ۋيلل سترونج يسلاندياداعى ءتورت ساعاتتىق جۇمىس اپتاسىن زەرتتەگەننەن كەيىن ونىڭ ناتيجەسىن بولىسكەن.
«زەرتتەۋ قاتىسۋشىلارى بەلسەندى جۇمىس ىستەپ، ودان ءلاززات الا باستادى. يسلانديا مەملەكەتتىك سەكتورى اپتاداعى جۇمىس كۇنىن قىسقارتۋدا پيونەر بولىپ، باسقا ۇكىمەتتەر ونى ۇلگى قىلۋى مۇمكىن»، - دەپ كەلتىردى سترونج ءسوزىن CBC راديوسى.
دەگەنمەن بۇل باستامانى قولدامايتىندار دا بار. مىسالى، تايم-مەنەدجمەنت ساراپشىسى لورا ۆاندەركامنىڭ ويىنشا، بۇل باستاما جۇمىسقا كەرى اسەرىن تيگىزەدى.
«ءتورت ساعاتتىق جۇمىس اپتاسى كارەرالىق مۇمكىندىكتەر سانى ازايۋىنا اكەلۋى مۇمكىن. جۇمىس ۋاقىتى قىسقارعان سوڭ ادامدار كارەراسىنا ماڭىزدى نەتۆوركينگ پەن كاسىبي وسۋگە جۇمسالاتىن ساعاتتاردان ايىرىلادى. سوندىقتان، ولاردىڭ كارەرالىق ءوسۋى باياۋلاۋى ىقتيمال»، - دەدى ۆاندەركام Businessinsider پورتالىنا.