«بۇل قاراجات، ياعني ۇلتتىق قوردان تۇسەتىن ينۆەستيتسيالىق كىرىستىڭ 50 پايىزى بالانىڭ مەنشىگىندە بولادى. 18 جاسقا، كامەلەتكە تولعان جىگىت نەمەسە قىز بۇل قاراجاتتى پايدالانىپ، ءبىلىم الۋعا نەمەسە جىلجىمايتىن مۇلىك ساتىپ الۋعا باعىتتاي الادى. سوندىقتان، بۇل جەردە اتا-انا تۋرالى اڭگىمە جوق»، - دەدى مينيستر و ك ق- دا وتكەن باسپا ءسوز ءماسليحاتىندا.
سونىمەن قاتار، مينيستر بالا تۋعان كەزدە بالالارعا ارنالعان شوت اۆتوماتتى تۇردە اشىلاتىنىن اتاپ ءوتتى.
«قازىرگى ۋاقىتتا ءتيىستى ورگاندارمەن بىرلەسە وتىرىپ، ونىڭ مەحانيزمى تالقىلانىپ جاتىر، ءبىراق شوت بالا تۋعان كەزدە اۆتوماتتى تۇردە اشىلادى. قازىرگى ۋاقىتتا قازاقستان ازاماتى سانالاتىن بالالارعا اۆتوماتتى تۇردە ەسەپشوت اشىلادى، تىكەلەي ءتيىستى بازا بار - ول ادىلەت مينيسترلىگى بازاسىنان تۇسەدى. سونىمەن قاتار، بالالاردىڭ ەسەپشوتىنا سالىق سالۋ جوسپارلانبايدى»، - دەپ ءتۇسىندىردى ول.
قۋانتىروۆ بالا كامەلەتكە تولعانعا دەيىن تۇراقتى تۇرعىلىقتى جەرىن اۋىستىرسا قۇقىعى شەكتەلە مە دەگەن سۇراققا دا جاۋاپ بەردى.
«ازامات تۇراقتى تۇرۋعا كوشسە دە، ءبىراق ازاماتتىعىن 18 جاسقا دەيىن ساقتاسا، وندا ول بۇل قاراجاتتى پايدالانا الادى»، - دەپ ءتۇسىندىردى مينيستر.