قالالىق سوتتىڭ قىلمىستىق ىستەر جونىندەگى سوت القاسى سوتتالۋشى كەلىنشەكتىڭ ءىسىن قايتا قاراپ، ونى سوت زالىنان بوساتتى، دەپ حابارلايدى قازاقپارات ءتىلشىسى.
قالالىق سوتتىڭ باسپا ءسوز قىزمەتى مالىمەتىنشە، بيىل جازدا ءال-فارابي اۋداندىق سوتىندا ل. دوسمامبەتوۆاعا، ق. سۇلتانبەككە جانە ج. اشتايەۆقا قاتىستى سوت ۇكىمى شىققان.
سوت ۇكىمىمەن بارلىق سوتتالعاندار ق ك 272-بابىنىڭ 2 جانە 3-بولىگىمەن كىنالى دەپ تانىلعان.
اشىق سوت وتىرىسى بارىسىندا سوتتالعانداردىڭ قاڭتار وقيعاسى كەزىندە شىمكەنت قالاسىنىڭ اۋماعىندا ورىن العان كۇش قولدانۋ، قيراتۋ، ورتەۋ، بۇزۋ، مۇلىكتى جويۋعا ۇلاسقان جاپپاي تارتىپسىزدىككە قاتىسقانى جانە ازاماتتاردى جاپپاي تارتىپسىزدىككە قاتىسۋعا شاقىرعانى انىقتالعان.
ولاردىڭ كىناسىن سوتقا دەيىنگى تەرگەۋ ورگانى جيناقتاعان دالەلدەمەلەر راستاعان.
سوتتالعانداردىڭ بۇرىن سوتتى بولعانى جانە ءىستىڭ باسقا دا ءمان-جايى ەسكەرىلىپ، ل. دوسمامبەتوۆاعا - 3 جىل 7 اي، ج. اشتايەۆقا - 3 جىل 1 اي باس، ق. سۇلتانبەككە - 3 جىل 6-اي باس بوستاندىعىنان ايىرۋ جازاسى تاعايىندالعان.
«قالالىق سوتتىڭ قىلمىستىق ىستەر جونىندەگى سوت القاسى ءۇش سوتتالۋشىنىڭ ءىسىن قايتا قاراپ، ل. دوسمامبەتوۆاعا قاتىستى ۇكىمدى وزگەرتتى. 12 جاسار بالاسىنىڭ بولۋىنا بايلانىستى ق ك 74-بابىنا ساي ۇكىمنىڭ ورىندالۋى 2 جىلعا كەيىنگە قالدى. وسى سەبەپتەن ل. دوسمامبەتوۆا سوت زالىندا بوساتىلدى. ال، قالعان ەكى سوتتالۋشىنىڭ ۇكىمى وزگەرىسسىز قالدى»، دەلىنگەن حابارلامادا.