قىتاي ب ا ق-ى قازاق كوشىنە تامسانادى: التايداعى مالشىلار جايلاۋدان كۇزەۋگە كوشە باستادى

نۇر- سۇلتان. قازاقپارات - بيىلعى العاشقى قاردان كەيىن اۋا رايىنىڭ كۇرت قۇبىلۋىنا جانە قۋاڭشىلىق سالدارىنان جايلاۋدىڭ ەرتە جۇدەۋىنە بايلانىستى قىتايدىڭ التاي وڭىرىندەگى قازاق مالشىلارى كۇزەۋگە جىلداعىدان جارتى اي ىلگەرى كوشتى.

جىلداعى سەكىلدى بيىلعى كوشكە دە قىتاي اقپارات قۇرالدارىنىڭ نازارى ەرەكشە اۋدى. قازاقپارات قىتايلىق ب ا ق-تا جاريالاعان وسى فوتورەپورتاجدى وقىرمانعا ۇسىنادى.

قىتايلىق China Daily باسىلىمنىڭ جازۋىنشا، ش ۇ ا ر- داعى بۋرىلتوعاي اۋدانىنىڭ مالشىلارى جەدەل جوسپارعا سايكەس 1-قىركۇيەكتەن باستاپ اسقار التايدىڭ قويناۋىنداعى ءتور جايلاۋدان سارىبۇلاق كۇزەۋىنە كوش تۇزەگەن.

كۇزگى كوشتىڭ جىلدام جۇرەتىنىن ەسكەرە وتىرىپ، التاي شەكارا باسقارماسىنىڭ بۋرىلتوعاي شەكارالىق جاساعى كوش ءتارتىبىن ساقتاۋعا، مالشىلاردى سۋسىنمەن، ءدارى- دارمەكپەن قامتاماسىز ەتۋگە جۇمىلدىرىلعان. جوسپارعا سايكەس، بيىل اۋدان بويىنشا 900 وتباسى 10 كۇننىڭ ىشىندە 400 مىڭ باس مالمەن سارىبۇلاق كۇزەۋىنە كوشىپ ۇلگەرۋگە ءتيىس.

ال التاي ايماعىنداعى كوكتوعاي اۋداندىق تۋريزم ءبولىمىنىڭ رەسمي پاراقشاسى دا «كۇللى تاريحى كوشپەن جازىلعان» قازاق حالقىنىڭ كۇزگى كوشى جايلى تامسانا جازدى. جالپى سوڭعى جىلدارى ايماقتا قازاق كوشى تۋريستىك رەسۋرس رەتىندە يگەرىلە باستاعان. مىسالى، «التايدىڭ سالقار كوشى» اتتى مادەني- تۋريستىك فەستيۆالى جەرگىلىكتى ەكونوميكانىڭ ءارتاراپتانۋىنا ايتارلىقتاي سەپتىگىن تيگىزىپ وتىر، دەپ حابارلايدى قىتايلىق شينحۋا اگەنتتىگى.

قىتايلىق رەسمي اگەنتتىكتىڭ جازۋىنشا، قازىرگى كۇندە جەر بەتىندەگى ەڭ ۇزاق ءداستۇرلى كوش جولى - قىزىلجىرا- سارىبۇلاق- قىزىلتاۋ باعىتىن تانىمال تۋريستىك مارشرۋت رەتىندە دامىتۋ قولعا الىنعان.

ال قىتايدىڭ عالامدىق تەلەارنا جەلىسى (CGTN) وتكەن جىلى قازان ايىندا تارباعاتاي ايماعىنىڭ تولى اۋدانىنداعى قازاق مالشىلارىنىڭ التىن- ەمىلدەن بارلىق قىستاۋىنا دەيىنگى كوش بارىسىن 18 ساعات بويى ءۇزىلىسسىز تۇردە تىكەلەي ەفيردەن كورسەتىپ، ونى الەمنىڭ ءار شالعايىنان جۇزدەگەن مىڭ ادام تاماشالاعان ەدى.

اۆتور ەرلان مازان