پياز كوزدى 5 مينۋت عانا اشىتادى
وسىمدىكتەر مەن جانۋارلار ءۇشىن ءومىر ءسۇرۋ - ءتىرى قالۋ جانە كوبەيۋ. بۇل پيازعا دا قاتىستى. قۇرتتار مەن كورتىشقاندار ونى قۇرتىپ جىبەرمەس ءۇشىن ول قورعانىپ ۇيرەنگەن. ونىڭ قورعانىش مەحانيزمى مىناداي:
- پياز ءوسۋ كەزىندە جەردەن كۇكىرت سىڭىرەدى، ناتيجەسىندە امينقىشقىلدار سۋلفوكسيدىن تۇزەدى؛
- بىرەۋ پيازدى تىستەسە نەمەسە كەسسە، سۋلفوكسيدتەر مەن پياز فەرمەنتتەرى بوساپ شىعادى، سونىڭ ناتيجەسىندە سۋلفون قىشقىلى بولىنەدى. ول تۇراقسىز جانە سين-پروپانتيال- S- وكسيدى گازىنا توپتاسادى؛
- سين- پروپانتيال- S- وكسيدى اۋاعا تۇسەدى دە، كوزبەن بايلانىسادى. كوز جاسى بەزدەرى تىتىركەنىپ، جاس شىعارادى.
بۇرىن عالىمدار پياز گازى وعان وزىنە ءتان ءدام بەرەتىن اللين فەرمەنتتەرى سەبەبىنەن تۇزىلەدى دەپ سانايتىن. ءبىراق 2002-جىلى جاپون عالىمدارى پياز فوكۋسى جاساۋراعىش فاكتورىنىڭ سينتەزى دەگەن فەرمەنتتە ەكەنىن ءتۇسىندى. وسى فەرمەنت سۋلفوكسيدتەرمەن حيميالىق رەاكسياعا تۇسەدى ەكەن. ياعني، بۇل جەردە ەكى فەرمەنت تە ماڭىزدى ءرول اتقارادى.
پيازدى كەسۋ كەزىندە تۇزىلەتىن گازدار كوز ساۋلىعىنا قاۋىپتى ەمەس. پيازدى كەسكەننەن كەيىن جاس شامامەن 30 سەكۋندتان كەيىن اعىپ باستايدى جانە ول پيازداعى سين-پروپانتيال- S- وكسيدى تولىقتاي ۇشىپ كەتكەن كەزدە (5 مينۋتتاي ۋاقىت) كەبەدى.
ال دايىندالعان پياز مۇنداي اسەر بەرمەيدى. سەبەبى قۋىرۋ نەمەسە قايناتۋ كەزىندە فەرمەنتتەردىڭ اسەرى جوعالادى.
پيازدى 30 مينۋتتاي سالقىنداتىپ الىڭىز
پياز تۋراعاندا كوزىڭىز قاتتى اشىماس ءۇشىن ونى الدىمەن 30 مينۋتتاي سالقىنداتىپ الىپ كورىڭىز. بۇل پياز فەرمەنتتەرىنىڭ بەلسەندىلىگىن ازايتادى. سودان سوڭ باسىن كەسىپ تاستاپ، قابىعىن ارشىپ، تۇبىنە تيىسپەۋ كەرەك. سەبەبى ونىڭ تۇبىندە ءسىزدى جىلاتاتىن كۇكىرت قوسىلىسىنىڭ جوعارى شوعىرى بار.
نەلىكتەن كەي پيازدار باسقالارىنا قاراعاندا كوزدى ازىراق اشىتادى؟
بۇل پيازدى وسىرەتىن توپىراق قۇرامىنداعى كۇكىرت مولشەرىنە بايلانىستى بولۋى مۇمكىن. نەمەسە مۇنداي پيازدا سين-پروپانتيال- S- وكسيدىن تۇزۋگە قاجەتتى فەرمەنتتەردىڭ از بولعانى.
عالىمدار ادامدى «جىلاتپايتىن» پياز شىعاردى
2008-جىلى جاڭا زەلانديادا عالىمدار گەنەتيكالىق تۇرلەندىرىلگەن پياز جاساپ شىقتى. ولار جاس شىعاراتىن فەرمەنتتىڭ وڭدەلۋىنە جاۋاپ بەرەتىن گەندى «ءسوندىرىپ تاستادى». ونىڭ ءدامى بۇرىنعىشا قالدى. ءبىراق ول نارىققا شىقپادى. ال 2020-جىلى جاس شىعارتپايتىن پيازدى امەريكاندىق سەلەكتسيونەرلەر شىعاردى. ونىڭ قۇرامىندا كوزدى تىتىركەندىرەتىن ۇشاتىن قوسىلىستار جوق. سونداي-اق ول قاراپايىم پيازدان تاتتىرەك. امەريكادا ونى Sunions دەگەن ماركامەن ساتىپ الۋعا بولادى جانە ول قاراپايىم پيازدان قىمباتىراق.
massaget.kz