جەتى جىلدىق وكىلەت بيىلعى پرەزيدەنت سايلاۋىنا دەيىن ەنگىزىلۋى كەرەك - ەرلان قوشانوۆ

نۇر-سۇلتان. قازاقپارات – ق ر پارلامەنتى ءماجىلىسىنىڭ ءتوراعاسى ەرلان قوشانوۆ الداعى پرەزيدەنت سايلاۋى مەن پرەزيدەنت وكىلەتىنىڭ مەرزىمى تۋرالى ءتۇرلى پايىمدار جايىندا پىكىر ءبىلدىردى، دەپ حابارلايدى قازاقپارات ءتىلشىسى.

«جاڭا قازاقستان» دەگەن دەپۋتاتتىق توپتىڭ ۇسىنىسى بولدى. 7 جىل مەرزىمگە ءبىر عانا مارتە سايلانۋدى وسى بيىلعى پرەزيدەنت سايلاۋىنان باستاۋ جونىندە ايتىپ وتىرمىن. ءوز باسىم وسىنى قولدايمىن. سەبەبى قازىر بىزدە ساياسي رەفورمالار ءجۇرىپ، ىسكە اسىپ جاتىر. رەفورمالاردىڭ ءبىرى - جاڭا ءسىز ايتىپ وتىرعان پرەزيدەنت وكىلەتىنىڭ مەرزىمى. بۇل ءبىزدىڭ مەملەكەتىمىزدىڭ بولاشاعى ءۇشىن وتە قاجەت، وتە ماڭىزدى. ويتكەنى بىزدە پرەزيدەنتتىك باسقارۋ فورماسى جۇمىس ىستەيدى. سوندىقتان وسى ماڭىزدى وزگەرىس بيىلعى سايلاۋدان باستالۋى كەرەك دەپ ەسەپتەيمىن»، - دەدى ول ءماجىلىستىڭ جالپى وتىرىسىنان كەيىن ب ا ق وكىلدەرىنە بەرگەن سۇحباتىندا.

ونىڭ پايىمىنشا، اتالعان رەفورمانى ءارى قاراي تاعى 5 جىلعا سوزا بەرۋدىڭ قاجەتى جوق.

«ەگەر بيىل 7 جىلدىق مەرزىمدى ەنگىزبەسەك، رەفورما تاعى 5 جىلعا سوزىلىپ كەتەدى. ول ماسەلەنى اقپارات قۇرالدارى دا، تەلەگرام-كانالدار دا ايتىپ جاتىر. وتكەن جولى دەپۋتاتتار توبى دا بۇل ماسەلەنى كوتەرگەن بولاتىن. ەگەر بيىل سول جۇيە ەنگىزىلمەسە، پرەزيدەنت بيىل 5 جىلعا سايلانسا، سايلانعان پرەزيدەنتتىڭ 5 جىلدان كەيىن تاعى 7 جىلعا سايلانۋعا قۇقىقتىق مۇمكىندىگى پايدا بولادى. بۇل نارسەنى دە شەكتەۋىمىز كەرەك. مۇنى شەكتەۋ ءۇشىن تاعى 5 جىلعا رەفورمانى سوزباي، بيىل 7 جىلدىق مەرزىمدى ەنگىزىپ، سونىمەن پرەزيدەنت سايلاۋىن وتكىزۋىمىز كەرەك دەپ ويلايمىن»، - دەدى ەرلان قوشانوۆ.