پرەزيدەنت قاسىم-جومارت توقايەۆ العاشقى تىركەۋ جانە ۋتيليزاتسياعا جىبەرۋ ءۇشىن تولەم قۇنى 200-250 مىڭ تەڭگەدەن اسپاۋى ءتيىس ەكەنىن اتاپ ءوتتى.
قازىر ۋاكىلەتتى مەملەكەتتىك ورگاندار مەن ۇيىمدار زاڭنامالىق اكتىلەرگە ازاماتتارعا اكەلىنگەن شەتەلدىك اۆتوكولىكتەرىن وزدەرى ءۇشىن قولايلى جاعدايدا زاڭداستىرۋعا مۇمكىندىك بەرەتىن تۇزەتۋلەر ەنگىزىپ جاتىر. سونداي- اق ونى جۇرگىزۋ تەتىكتەرى ازىرلەنۋ ۇستىندە.
2022 -جىلعى 1-قىركۇيەككە دەيىن قازاقستانعا اكەلىنگەن (كىرگەن) بارلىق كولىك قۇرالدارى بويىنشا ىشكى ىستەر، مەملەكەتتىك كىرىستەر جانە ۇلتتىق قاۋىپسىزدىك ورگاندارى (شەكارا قىزمەتى) اراسىندا اقپارات الماسۋ ماسەلەلەرى پىسىقتالدى.
مۇنداي مالىمەتتەردى ءى ءى م بەلگىلەنگەن مەرزىمنەن كەيىن اكەلىنگەن كولىكتەردى زاڭداستىرماس ءۇشىن جيناقتايدى.
1-قىركۇيەكتەن كەيىن قازاقستانعا اكەلىنگەن اۆتوكولىكتەردەن باسقا كريمينالدىق ەسەپ بويىنشا ىزدەۋدە جۇرگەن، زاڭ نەمەسە سوت تاراپىنان شەكتەۋلەرى بار، بۇرىن تىركەلگەن ەلدەگى ەسەپتەن بەلگىلەنگەن تارتىپپەن الىنباعان، ءرۋلى وڭ جاقتا ورنالاسقان، سونداي- اق تىركەۋدەن نەمەسە تولىق كەدەندىك تەكسەرىستەن وتپەگەن، يەلەرىنىڭ تىركەۋ جانە قۇقىق بەلگىلەيتىن قۇجاتتارى جوق اۆتوكولىكتەر زاڭداستىرىلمايدى.
سونداي-اق «كريمينالدىق» اۆتوكولىك تىركەلىپ كەتپەس ءۇشىن كولىك بويىنشا اقپارات بۇرىنعى تىركەلگەن ەلدەردىڭ قۇقىق قورعاۋ جانە كەدەن ورگاندارىمەن سالىستىرىلادى.
«ازاماتتاردى اۆتوكولىك ساتىپ الۋ كەزىندە زاڭنامانى ساقتاۋعا، ولاردىڭ زاڭدى «تازالىعىن» مىندەتتى تۇردە تەكسەرۋگە شاقىرامىز» دەيدى پوليتسيادان.