قازاقستاندا ۆيزانىڭ جاڭا تۇرلەرى پايدا بولادى
ولاردى ىسكە اسىرۋ ماقساتىندا كوشى- قون ساياساتىنىڭ الداعى 5 جىلعا ارنالعان جاڭا تۇجىرىمداماسى شەڭبەرىندە رەسپۋبليكادا شەتەلدىكتەر ءۇشىن ەرەكشە جاعدايدى كوزدەيتىن باعالى داعدىلار مەن ينۆەستيتسيالىق ۆيزا ءۇشىن ارنايى ۆيزالار ەنگىزۋ كوزدەلەدى، دەپ حابارلايدى قازاقپارات.
مەملەكەت باسشىسىنىڭ تاپسىرماسىن ورىنداۋ ءۇشىن جاڭا تۇجىرىمداما شەڭبەرىندە قازاقستان ءۇشىن تاپشى جانە ءجيى تارتىلاتىن كاسىپتەر بويىنشا 100 ۇزدىك شەتەلدىك ماماندى تارتۋدىڭ تەتىگى كوزدەلەدى.
بۇل كاسىبي مامانداردىڭ مىندەتى - ءبىلىم ترانسفەرى جانە وندىرىستە جۇمىس ىستەيتىن قازاقستاندىقتاردى دايارلاۋ بولادى.
ولار ءۇشىن تۇرۋعا ىقتيارحاتى بار «باعالى داعدىلارعا ارنالعان ۆيزا» ەنگىزىلەدى جانە قازاقستاندىق كادرلاردى وزىق دايارلاۋ ءۇشىن ۇنەمى جاڭارتىلىپ وتىراتىن باعالى داعدىلار رەيتينگى (تاپشى كاسىپتەر مەن ماماندىقتار) جاسالادى.
سونداي-اق، مەملەكەت باسشىسىنىڭ تاپسىرماسىن ىسكە اسىرۋ اياسىندا جاڭا تۇجىرىمداما جوباسىندا بيزنەس- يمميگراتسيا تاسىلدەرى وزگەرتىلەدى.
ە ى د ۇ ەلدەرىنىڭ تاجىريبەسىن نەگىزگە الا وتىرىپ، قازاقستان ەكونوميكاسىنا ءبىر مەزگىلدە 300 مىڭ ا ق ش دوللارىن ينۆەستيتسيالاعان شەتەلدىك بيزنەسمەندەر ءۇشىن ينۆەستيتسيالىق جانە ىسكەرلىك ۆيزالار الۋ شارتتارىن قايتا قاراۋ ۇسىنىلادى.
«ينۆەستيتسيالىق ۆيزا» 10 جىل تۇرۋعا رۇقسات بەرەدى. ۆيزا يەسى بيزنەستى تىركەۋگە، مۇلىككە يەلىك ەتۋگە، قارجى وپەراتسيالارىن جۇرگىزۋگە مۇمكىندىك الادى.
بۇل قازاقستانعا جىلىنا، اسىرەسە كرەاتيۆتى يندۋستريانى دامىتۋ سالاسىندا 100-گە دەيىن بيزنەسمەن- ينۆەستور تارتۋدى نەعۇرلىم ناقتى ماقساتقا اينالدىرادى.
بۇدان باسقا ءبىلىم يمميگراتسياسىن دامىتۋ ماقساتىندا تۇجىرىمدامادا مىنالار كوزدەلەدى:
- شەتەلدىك جەتەكشى ءبىلىم مەكەمەلەرىن اكادەميالىق ۇتقىرلىق باعدارلاماسىنا تارتۋ جانە قوس ديپلومدى ءبىلىم بەرۋ پراكتيكاسىن ودان ءارى دامىتۋ ارقىلى ەلدىك ءبىلىم بەرۋ ينفراقۇرىلىمىن كەڭەيتۋ؛
- سۇرانىسقا يە ماماندىقتار بويىنشا 100 ۇزدىك وقىتۋشىنى جانە سۇرانىسقا يە تەحنولوگيالار بويىنشا عالىمداردى تارتۋ.
بۇل رەتتە شەتەلدىك عالىمدار مەن وقىتۋشىلار ءۇشىن تۇرۋعا ىقتيارحات، ال كەيىننەن قازاقستان ازاماتتىعىن الۋ قۇقىعىن بەرە وتىرىپ، ۇزاق مەرزىمدى (10 جىلعا دەيىن) «عىلىمي- پەداگوگيكالىق ۆيزالار» بولادى.
وسى ستراتەگيالىق مىندەتتى ىسكە اسىرۋ ەلىمىزدىڭ جوعارى مەكتەپ پەن عىلىمنىڭ بەدەلىن، ازاماتتارىمىزدىڭ زياتكەرلىك جانە شىعارماشىلىق الەۋەتىن ارتتىرۋعا جانە، سايىپ كەلگەندە رەسپۋبليكامىزداعى ادامي كاپيتالدىڭ يننوۆاتسيالىق دامۋىنا جاعداي جاساۋعا مۇمكىندىك بەرەدى.